Rrjeti i Grave të Kosovës (RrGK) ka shprehur shqetësimin për vrasjen e një gruaje nga bashkëshorti i saj, i cili dyshohet se e vrau me shufër metalike.RrGK i bën thirrje Gjykatës Themelore që ta trajtojë rastin me kujdes dhe ta japë dënimin e merituar për dorasin.

“RrGK u bënë thirrje institucioneve të drejtësisë, respektivisht Gjykatës Themelore të Gjilanit që është duke e trajtuar rastin, që të ketë kujdes të shtuar në trajtim të këtij rasti, dhe që dorasi të marrë dënimin e merituar, ashtu siç parashihet me ligj për kyerjen e veprës penale “vrasje e rëndë”, vepër e sanksionuar me Kodin Penal të Republikës së Kosovës”.

“Duke pasur për bazë gjetjet e hulumtimeve të realizuara nga RrGK, shpesh herë është vënë re se gjyqtarët, prokurorët, si dhe zyrtarët policor, gjatë trajtimit të rasteve të dhunës në familje, kanë tendencë të fajësojnë viktimën, madje edhe kur të gjitha provat dëshmojnë për dhunë me pasoja të rënda fizike dhe emocionale. Andaj, RrGK do ta monitorojë për së afërmi këtë rast, për t’u siguruar që drejtësia do të zbatohet”.

“Për çdo dështim, nga institucionet do të kërkojmë përgjegjësi për mos efikasitet dhe pandëshkueshmëri të vrasësve të grave. Ne do të ushtrojmë presion publik në rast se nuk ndërmerren hapat e duhur ligjor”.Në kërkim të drejtësisë, RrGK thekson se do të ndërmarrë një aksion në ditët në vijim, për të cilin mediat do të njoftohen me kohë.