Covid-19 u përhap fare shpejtë pothuajse në tërë botën.

Më 13 mars në Kosovë u shënua rasti i parë i infektuar me virusin SARS-COV-19.

Deri më tani në vendin tonë kanë rezultuar mbi 5600 raste pozitive

Menjëherë pas identifikimit të rasteve të para me Covid-19 në Kosovë, mediat në vend iu përkushtuan në tërësi raportimit për sektorin e shëndetësisë, pasi gjithmonë lajmi i parë vinte nga Klinika Infektive.

Një realiteti i ri u krijua në mars, jo vetëm për qytetarët që në ankth shihnin lajmet nga shtëpitë e tyre, por edhe për vet gazetarët që po raportonin. Ata nuk kishin përjetuar ndonjëherë një situatë të tillë të jashtëzakonshme.

Megjithatë, nga Klinika Infektive ku po trajtoheshin pacientët me koronavirus, raportohej çdo ditë e çdo natë, me storie të përgatitura, lidhje të drejtpërdrejta intervista me infektologë që konsideroheshin tashmë heronjtë e kësaj lufte me virusin e panjohur.

Përhapja e koronavirusit në Kosovë ndryshoi edhe jetën e gazetarëve dhe punëtorëve të tjerë në media.

Jeta e tyre zhvillohej përreth klinikave e institucioneve të tjera shtetërore që menaxhonin situatën me pandeminë.

Jehona Zhitia, e cila mbush dy dekada shërbim në profesionin e gazetarisë, që prej fillimit të pandemisë ka qenë në krye të detyrës, duke raportuar më të rejat gjithmonë nga vendi i ngjarjes.

Përvoja 10-vjeçare në sektorin e shëndetësisë duket se ia ka bërë paksa më të lehtë asaj kryerjen e detyrës në një situatë të tillë, ani pse as ajo nuk i shpëtoi dot sfidës me distancim nga familja dhe fëmijët e saj.

Jehona Zhitia – Gazetare, RTK

“Në fillim ishte ajo doza e frikës, ndoshta jo për vetën por që mund të isha bartës potencial i virusit së pari tek familja ime, pastaj tek kolegët dhe rrethin me të cilin unë qëndroja çdo ditë. U mundova në fillim të krijoja një lloj distance qoftë edhe me fëmijët e mi brenda shtëpisë, qëndronim në dhoma të ndara sepse ende nuk dihej se si mund të infektoheshim, unë çdo ditë isha nëpër klinikat e QKUK-së”.

Për shkak të situatës së krijuar me pandemi, përveç në sektorë të tjerë, edhe mediat u detyruan të riorganizohen, disa shkurtuan orarin e punës, e disa edhe stafin.

Pothuajse në çdo medium u bë një kombinim, disa ishin në teren në krye të detyrës, e disa që kishin mundësi punuan nga shtëpitë e tyre.

Ideal Gola, redaktor përgjegjës në Agjencinë e Lajmeve KosovaPress tregon se nga 13 marsi ka ndryshuar në tërësi puna e tyre.

KosovaPress, që vazhdimisht sjell lajme ditore, intervista, reportazhe e dokumentar të realizuara me kamerë, në këtë periudhë u detyrua të aktivizojë platformat online në mënyrë që të sjellë informacione rreth pandeminë nga secila komunë.

Ideal Gola – Redaktor përgjegjës, Agjencia e Lajmeve KosovaPress

Gola: Një pjesë e stafit punon nga shtëpia

“Ne si Agjenci e Lajmeve, të ata persona që kanë pasur mundësi të punojnë nga shtëpia atëherë menjëherë janë udhëzuar që të punojnë nga shtëpitë, ndërsa një pjesë tjetër, gazetarët, redaktorët por edhe kameramanët e kanë pasur të pamundur që punën e tyre ta bëjnë nga shtëpitë, megjithatë është krijuar një formulë që të ketë rotacione në mes të gazetarëve dhe kameramanëve që ata mos të jenë të gjithë në të njëjtën kohë në punë.

Por raportimet nga Klinika Infektive që bëheshin çdo ditë, nuk i ndali asnjëherë, megjithë rrezikun që ju kanosej edhe vet punëtorëve të mediave që qëndronin aty.

Gola: Marrim informata duke e ruajtur shëndetin

“Ka qenë e detyruar që ne të shkojmë të Klinika Infektive, por edhe në komunat e para ku shpërthejë virusi, si Klina e Malisheva, ka qenë përgjegjësi sepse ti po e ekspozon gazetarin, por njëjtën kohë nuk mund ta detyrohesh të rrezikojë shëndetin e tij… Megjithatë është bërë një kompromis, gjithmonë duke i marrë masat mbrojtëse, dorëza e maska, por edhe duke i rekomanduar që mos të rrezikojnë shumë, të merret informacioni por duke ruajtur shëndetin”.

Në këtë situatë kërkohej kujdes i shtuar dhe profesionalizmi mos të mungojë, për shkak të ndjeshmërisë së lajmeve që raportoheshin.

Zhitia: Jam munduar të mos krijojë panik

“Përgjegjësia ishte shumë e madhe, për mua si gazetare ishte një sfidë shumë e re por edhe një përvojë e cila do të mbetët shumë e veçantë në karrierën time si gazetare sepse çdo informacion që unë transmetojë përmes kanalit të RTK-së e dija që do të shkojë në veshin e mijëra shikuesve. Gjithmonë jam munduar që paraqitjet e mija televizive të mos krijojnë panik, mos të përbëjnë shqetësim”.

Gazetarja Jeohna Zhitia rrëfen vështirësitë që ka pasur në rastet kur është dashur të raportojë për numrin e personave të vdekur me Covid-19.

Zhitia: Kisha informacione për vdekjen e pacientëve por jam kursyer t’i jap

“Kish momente kur unë i kisha informacionet të rasteve të vdekjeve ende para se ato të bëheshin publike nga institucionet mirëpo për shkak të situatës së ndjeshme, për shkak se shumë familje ishin me sy e vesh para ekranit televiziv dhe e dija që po e prisnin lajmin nga Klinika Infektive, jam kursyer mos t’i jap ato deri në momentin kur i kam ri konfirmuar zyrtarisht”.

Megjithë rrezikun, është natyra e punës së gazetarëve që të jenë kudo që kërkohet, në mënyrë që qytetarët të jenë të informuar rreth çështjeve që janë me interes publik.