Kryeministri Avdullah Hoti ka prezantuar sot në Akademinë e Shkencave dhe të Arteve të Kosovës, kornizën e Qeverisë së Kosovës për dialogun me Serbinë.

Ai ka thanë se integriteti territorial i Kosovës është i panegociushëm dhe se në këtë marrëveshje do të adresohen të gjitha çështjet e hapura me Serbinë, siç është fati i të pagjeturve dhe një listë e gjatë e çështjeve që janë në pritje.

Njohësi i çështjeve politike, Shkodran Ramadani thotë për RTV Dukagjinin se kjo kornizë e dialogut e prezantuar nga Qeveria e Kosovës do të përballet me një realitet të hidhur.

“Ky dokument i Qeverisë së Kosovës do të përballet me një realitet më të hidhur, i cili do të jetë sfidë për këtë idealizëm të tepruar të Qeverisë së Kosovës. Nëse nuk bënë asnjë kompromis dialogu është i parealizueshëm”, deklaroi Shkodran Ramadani.

Hoti ka shtuar më tej se këtë kornizë ditëve në vijim do ta prezantojë edhe para përfaqësuesve vendor e ndërkombëtarë.