Asnjë veprim nuk është ndërmarrë për shënjimin e kufirit në terren me Malin e Zi, dy vjet pas ratifikimit të Marrëveshjes.
Madje, Qeveria e udhëhequr nga Avdullah Hoti nuk e ka emëruar ende Komisionin e ri për shënjimin dhe mirëmbajtjen e kufirit shtetëror me Malin e Zi, pas shkarkimit të mëparshmit që udhëhiqej nga Shpejtim Bulliqi më 1 korrik.
Burime brenda Qeverisë i kanë thënë “Kohës” se janë duke u diskutuar emrat e rinj dhe mundësia që në krye të këtij komisioni të vendoset Tomor Qela.
Në vitin 2017, Qela ka qenë zëdhënës i Komisionit Qeveritar për matjen e territorit të Kosovës, të cilin e pati themeluar ish-kryeministri Mustafa.
Ky komision kishte konfirmuar versionin e miratuar nga Komisioni Meha, sipas të cilit Kosova nuk humb asnjë hektar tokë në raport me Malin e Zi.
Në lidhje me këtë, “Koha” prej javës së kaluar ka pyetur në Qeveri por nuk janë përgjigjur. Përgjigje nuk kanë ofruar as zyrtarë të AAK-së në kabinetin qeverisës, të cilët kishin kritikuar ish-ekipin ku bënte pjesë Qela.
Ndërkaq Tomor Qela ka thënë se nuk ka marrë ofertë nga Qeveria në lidhje me mundësinë e emërimit në krye të Komisionit. Por nuk e ka përjashtuar mundësinë që në të ardhmen të ndryshojë diçka.
Qela e ka përsëritur se vazhdon t’u qëndrojë prapa qëndrimeve të shprehura deri më tani sa i përket vijës së kufirit.
Muajt e fundit ai ka qenë aktiv edhe me shkrime të ndryshme, duke i quajtur pseudo-ekspertë ata që pretendojnë se Kosova humb rreth 8 mijë hektarë dhe nuk morën asnjë veprim për kthimin e tyre. Reagimin e ka bërë pas dorëheqjes së ish-kryesuesit Shpejtim Bulliqi dhe anëtarit tjetër, Florim Isufi. Në fund të çdo artikulli të tij, porosia e Qelës ka qenë “do të dëgjohemi e shihemi pas Corona-VIRUSIT!”.
“Ne nuk do të heshtim, ngase edhe pas formimit të Komisionit të fundit për shënjimin dhe mirëmbajtjen e kufirit të Kosovës, dhe dy vite pas ratifikimit të Marrëveshjes ndërkombëtare të kufirit me Malin e Zi pa hequr asnjë presje, nga Parlamenti i Kosovës (21.03.2018), “ekspertët” e mbështetësit e tyre jo që “nuk lëvizën asnjë guralec për t’i kthyer 8.200 ha” (!) e rremë, por nuk bënë asnjë hap në realizimin e premtimeve minimale për të vendosur kufirin në Çakorr, Kullë dhe Zhleb, qoftë edhe me procesin e shkëmbimit të dokumentacionit, si në rastin e kufirit me Maqedoninë. Prandaj, pseudoekspertët nuk mund të ikin nga përgjegjësia profesionale, morale dhe materiale, por janë të obliguar që në secilin sektor përgjatë segmentit të kufirit me Malin e Zi t’i gjejnë dhe specifikojnë në detaje humbjet e sipërfaqeve për secilën zonë kadastrale, ashtu siç bëri evidentimin e humbjes së territorit tonë për 191 ha përgjatë segmentit të kufirit me Maqedoninë Komisioni për Matjen e Territorit të Republikës së Kosovës, në përputhje me kërkesat e faktorit ndërkombëtar (Plani i Ahtisarit). Do të dëgjohemi e shihemi pas Corona-VIRUSIT!”, ka thënë Qela.
Ish-kryesuesi i Komisionit për shënjimin e kufirit, Shpejtim Bulliqi, thotë se ata e kanë kryer punën profesionale e cila dëshmon humbjen e mijëra hektarëve, por që Qeveria aktuale nuk ka vullnet për finalizimin e procesit.
“Koha” pati raportuar se Qeveria e kaluar e udhëhequr nga Ramush Haradinaj për dy vjet nuk i ishte përgjigjur Malit të Zi në kërkesat e tyre për shënjimin e kufirit në terren. Ndërkaq Marrëveshja ishte ratifikuar në mars të vitit 2018, pas nënshkrimit të një deklarate mes presidentëve Thaçi e Vujanoviq për korrigjim të kufirit në drejtim të Kullës dhe Çakorrit.
