Me anë të një komunikate për media, sindikata e infermierëve nuk ka përjashtuar mbajtjen e protestave.

“Andaj, Sindikata e Infermierëve të Kosovës, duke mos dashur t’a anashkalojë dialogun social, fton Ministrinë e Shëndetësisë, SHSKUK-në, Ministrinë e Financave dhe të gjitha institucionet tjera relevante që t’i thërrasin arsyes dhe të reflektojnë deri ditën e Martë 01/09/2020 në ora 16:00h”.

“Në rast se deri në atë kohë nuk do të ekzekutohen pagesat shtesë sipas listave dhe rekomandimeve që me kohë janë dërguar, ftojmë të gjitha komunitetet, në veçanti komunitetin infermier, mami dhe profesionist tjerë shëndetësor, anëtar të Sindikatës së Infermierëve të Kosovës që ditën e Mërkurë, 02/09/2020 nga ora 12:00 të mblidheni para zyrave të drejtorisë së SHSKUK-së në shenjë proteste”, thuhet në reagimin e SIK-ut.

Tutje, kjo sindikatë ka thënë se ndjehet e mashtruar dhe e indinjuar me mos-ekzekutimin e këtyre mjeteve.

“Sindikata e Infermierëve të Kosovës, është e indinjuar dhe ndjehet e mashtruar me mos ekzekutimin e shtesave mbi pagë në vlerë prej 300€ për muajt Korrik dhe Gusht 2020 për punonëtorët shëndetësor në përgjithësi, me theks të veçantë për komunitetin infermier, mami dhe profesionist tjerë shëndetësor”., thuhet aty.

Ndryshe, ministria e Shëndetësisë sot me anë të një komunikate për media tha se këto mjete nuk janë ekzekutuar për shkak se listat e dërguara nuk kanë plotësuar kriteret e kërkuara.