Institucionet e drejtësisë në vend po vazhdojnë të qëndrojnë të heshtura karshi deklarimeve të ish-drejtorit të ATK-së, Ilir Murtezaj si dhe akuzave që ky i fundit ka pasur për kryeministrin Avdullah Hoti. Në Prokurorinë Speciale nuk kanë treguar nëse ka apo do të ketë hetime për rastin. Të heshtur kanë qëndruar gjatë ditës edhe në ekzekutiv.
Shkarkimi nga detyra e drejtorit të ATK-së, ka bërë që Ilir Murtezaj të mos pritë as edhe javën e të del në një konferencë për media, duke hedhur akuza të rënda për kryeministrin e Kosovës, Avdullah Hotin.
Murtezaj që është në mesin e tre drejtorëve që për një ditë i ka shkarkuar Hoti, e ka akuzuar kryeministrin për përfshirje në një rrjet kriminal të fshehjes së tatimeve me ndihmën e zyrtarëve të ATK-së, duke mundësuar kështu shlyerjen e borxheve, favorizimin e bizneseve e duke instaluar nepotizmin në institucione të ndryshme.
“Kemi pasur një dyshim për një rrjet kriminal në vijë vertikale me abuzime të detyrës zyrtare, si dhe me dëmtim të buxhetit me miliona euro në periudhën 2016-2018, nën dijeninë e drejtorit të përgjithshëm të ATK-së dhe ish-ministrit të Financave, e tash që është kryeministër. Si dhe heshtja e tyre ndaj denoncimeve të shumta për abuzim me detyrën zyrtare, për përfitime të jashtëligjshme nga ana e zyrtarit hetimor, për dhënie të mundësisë të funksionimit të bizneseve të lojërave të fatit pa licenca. Për mos ngritje të kallëzimeve penale për 301 raste, për 301 biznese në periudhën 2018 deri në shkurt të vitit 2019. Dhe për të gjitha këto është heshtur nga ana e linjës vertikale. Kjo sigurisht që është adresuar nga ana e imja me ardhjen në detyrë tek organet e drejtësisë, Policia e Kosovës, Prokuroria e Shtetit. Dhe që për këtë sigurisht organet e drejtësisë do të japin fjalën e fundit”, u shpreh ai, duke thënë se me këtë temë po merren edhe organet e drejtësisë.
Sipas pretendimeve të Murtezaj, gjatë kësaj periudhe bizneset nuk janë trajtuar njëjtë, e gjithashtu thotë se janë fshirë milionë euro borxhe derisa askush nuk ka dhënë llogari e përgjegjësi për veprime të tilla.
“Kemi mbi 7200 biznese të cilat për tri vite radhazi 2017-2019 kanë realizuar qarkullim mbi 3,5 miliardë euro dhe zero pagesë të tatimeve. Kjo ka qenë në dijeni të ish-menaxhmentit të ATK-së, ka qenë në dijeni të ish-ministrit të Financave tash të kryeministrit dhe nuk është vepruar absolut fare…Pastaj kemi mbrojtjen e bizneseve të caktuara nga njerëz të fuqishëm që kanë qenë në ATK. Pozita e zëvendësdrejtorëve. Iu janë krijuar favore bizneseve të caktuara, duke iu shmangur qindra mijëra euro tatime. Raste këto të cilat sigurisht që janë proceduar në organe të drejtësisë. Janë duke u trajtuar, por ushtrimi i ndikimit nga brenda ATK-së dhe jashtë ATK-së po i ngadalëson këto procese edhe do të heshtin të gjitha ato…(13:17) Nën dijeninë e plotë të menaxhmentit të ATK-së, të ish-ministrit të Financave, tash kryeministër, të evidentuara në raportin e institucionit ndërkombëtare janë lejuar të anulohen, të fshihen milionë euro borxhe pa dhënë askush llogari dhe përgjegjësi”, ka deklaruar Murtezaj, teksa ka shtuar se të njëjtat informacione ia ka dhënë edhe institucioneve të drejtësisë, e ato tashmë janë duke hetuar rastin.
Ani pse Murtezaj thotë se institucionet e drejtësisë janë duke hetuar këto informacione që thotë se tashmë i ka deponuar te organet e rendit, të pyetur nga Gazeta Express në Prokurorinë Speciale tash e dy ditë nuk kanë treguar nëse ka hetime për këtë rast.
Gazeta ka pyetur nëse ka hetime apo nëse të njëjtat do të nisin pas pretendimeve të Murtezaj. Deri në momentin e publikimit të lajmit, ky institucion ka qëndruar në heshtje.
Akuzave të Murtezajt nuk iu janë përgjigjur as në Qeverinë e Kosovës. Në ekzekutiv nuk kanë folur të pyetur nga Gazeta për deklarimet e ish-shefit të ATK-së, e rrjedhimisht nuk kanë dhënë informacione nëse Hoti do të shqyrtonte që ta padiste për shpifje njeriun që e shkarkoi.
Murtezaj ishte emëruar në krye të ATK-së në shkurt të vitit 2019-të nga Qeveria që udhëhiqej nga Ramush Haradinaj.
Ai së bashku me tash ish-drejtorin e Policisë së Kosovës, Rashit Qalaj dhe ish-Drejtorin e Doganës, Ibrahim Xhakën.
