Në ndërtesën e Postës së Kosovës, sot në mëngjes ka ndodhur një rrahje ndërmjet drejtorit të Operacioneve, Faton Thaçit dhe një punëtori të kësaj ndërmarrje V.T, raporton Front Online.

Lidhur me këtë nga Polica e Kosovës, për FrontOnline, kanë thënë se rasti është nën hetim dhe se policia në koordinim me prokurorinë do t’i marrin të gjitha veprimet lidhur me rastin,

“Sot rreth orës 09:30 kemi pranuar informatën për një mosmarrëveshje që ka ndodhur brenda objektit të Postës së Kosovës. Aktualisht rasti ndodhet në fazën fillestare të interviston, ku nga njësitet kompetente po intervistohen palët e përfshira si dhe dëshmitarët. Hetuesit policor në koordinim të ngushtë me prokurorinë përkatëse do të ndërmarrin veprimet e mëtejme lidhur me rastin në fjalë”, kanë bërë të ditur nga Polica.

Rastin e ka konfirmuar edhe kryeshefi i kësaj ndërmarrje, Salih Morina, duke mos dhënë shumë detaje.

Ai tha se sot ka ndodhur një incident, arsyet e të cilit nuk i dinë dhe se me rastin po merret Policia e Kosovës.

“Arsyeje nuk i dimë ne, arsyet i dinë policia d.m.th. ata kanë dhanë deklarata në polici për arsyen e incidentin, të dy ata që ishin në konflikt i ka marrë në pyetje policia gjithashtu edhe dëshmitaret kanë dhënë deklaratat e tyre, incidenti apo konflikti ka ndodhur në ndërtesën e Postës”, tha shkurt ai për Front Online.
Kujtojmë se Faton Thaçi, i përfshirë në incident ka qenë zëvendësministër i Ministrisë së Tregtisë nga partia Nisma Socialdemokrate në Qeverinë “Haradinaj’.