Në orët e para të mëngjesit të së enjtes policia ka zhvilluar një aksion në vende të ndryshme të Kosovës lidhur me përfshirjen në veprimtari kriminale.
Aksion ky që vjen si vazhdimësi e asaj në Karaçevë të Kamenicës ku u rrënuan kazinotë e u arrestuan pronarë të tyre e edhe zyrtarë policorë.
Polica e Kosovës ka njoftuar se aksioni i sotëm është duke u bërë në bashkëpunim me Prokurorinë Themelore në Gjilan dhe Inspektoratin Policor të Kosovës.
“Prokuroria Themelore në Gjilan, ju njofton se në orët e para të mëngjesit të 01 Tetorit 2020, zyrtarët e agjencive të zbatimit të ligjit nga Policia e Kosovës, Inspektorati Policor i Kosovës dhe agjencitë e tjera bashkëpunuese, janë duke ekzekutuar urdhërkontrolle në rajone të ndryshme të Kosovës. Ky aksion është vazhdimësi e operacionit të zhvilluar më 18 Shtator 2020, në zonën e Karaçevës dhe rajone tjera të Kosovës, për shkak të dyshimit të përfshirjes në veprimtari kriminale. Prokuroria Themelore në Gjilan, në koordinim dhe bashkëpunim me Policinë e Kosovës dhe Inspektoratin Policor të Kosovës, do të ju mbajë të informuar lidhur me këtë operacion të përbashkët”, thuhet në komunikatën e policisë.
