Policia e Kosovës jep detaje për sulmet e djeshme në Zubin Potok dhe Zveçan

Sot është bërë një javë që nga dita kur Qeveria e Kosovës vendosi reciprocitet me shtetin e Serbisë, sa i përket targave të automjeteve.

Me të marrë ky vendim, asnjë automjet nga shteti serb nuk mund të hyjë në territorin e Kosovës pa u pajisur me targa të përkohshme, apo targa të njohura si provuese.Ky vendim i marrë nga Qeveria e Kosovës bëri që situata në veri të jetë e tensionuar, ku serbë të shumtë vazhdojnë të protestojnë kundër këtij vendimi.

Përpos vendosjes së barrikadave të shumta në Jarinje dhe Bërnjak, gjatë ditës së djeshme pati edhe disa incidente të tjera.

Njëra prej tyre ishte ku persona të dyshimtë kanë djegur objektin e Qendrës së Regjistrimit të Automjeteve në komunën e Zubin Potokut.

E lidhur me këtë nga Policia e Kosovës kanë deklaruar se në rrethana të panjohura zjarri ka përfshirë njërën nga zyrat e kësaj komune.

“Zubin Potok 25.09.2021 – 01:05. Raportohet se në rrethana të panjohura në zjarr është përfshirë zyra e Komunës së Zubin Potokut. Zjarrfikësit kanë shuar zjarrin. Njësit përkatëse policore janë duke hetuar rastin”.

Përpos kësaj një raportim tjetër u bë në Zveçan, ku persona të panjohur kanë thyer xhamin e zyrës së regjistrimit dhe kanë hedhur dy granata dore.

“Njësia për deminim ka dal dhe ka bërë asgjësimin e mjeteve të pashpërthyera në mënyrë të kontrolluar”, thuhet në njoftimin e PK-së.

Gjithashtu u theksua se njësitë përkatëse të policisë janë duke hetuar rastin.

Lidhur me këto raste dje u deklarua edhe ministri i Brendshëm, Xhelal Sveçla.

Ndër të tjerash ai tha se përkundër veprimeve të tilla, Qeveria e Kosovës do të vazhdojë me angazhim të plotë në zbatimin e vendimit në tërë territorin.

“Ftojmë qytetarët në veri që të respektojnë ligjet dhe të mos dirigjohen apo manipulohen nga ata të cilët mbijetojnë politikisht, apo përfitojnë materialisht, vetëm falë tensioneve”, shtoi ai.

Apliko online për kredi në IBAS, përfito subvencionim nga Qeveria

Sponsoruar