Kryeministri irlandez, Leo Varadkar njoftoi sot se qeveria e tij do të përshpejtonte edhe një herë procesin e lehtësimit të masave kufizuese në Irlandë, në sajë të progreseve të regjistruara në luftën kundër koronavirusit.

“Qeveria miratoi një ndryshim të planit të veprimit”, theksoi drejtuesi në një konferencë shtypi.

Vendet e kultit dhe të argëtimit, palestrat, kinematë dhe parukeritë do të mund të hapen që prej 29 qershorit, më herët nga sa ishte parashikuar.

Aktivitetet sportive do të mund të rifillojnë gjithashtu dhe grumbullimet masive do të autorizohen, por të kufizuara deri në 50 persona në ambjente të mbyllura dhe 200 persona në ambjente të hapura deri më 20 korrik.

Meqënëse virusi nuk ka ikur ende, është e rekomandyar të punohet nga shtëpia kur është e mundur.

“Ndjenja e shpresës ka qenë gjithnjë e pranishme dhe na ka sjellë këtu ku jemi tani, përpara afatit, të aftë të përshpejtojmë rihapjen e shoqërisë dhe ekonomisë sonë”, theksoi Leo Varadkar.

“Ne do të jetojmë një lloj jete shumë të ndryshme, por një jetë ku ne mund të bëjmë kaq shumë gjëra që janë përsëri të rëndësishme për ne dhe familjet tona”, shtoi ai. /ata/