Kryetari i PDK’së, Kadri Veseli nuk do të intervistohet në Prokurorinë Special në Hagë pas publikimit të aktakuzës nga Prokurori Special i Dhomave të Specializuara kundër tij dhe presidentit Hashim Thaçi. Zëdhënësi i PDK’së, Avni Bytyçi i tha Gazetës Express se kryetari Kadri Veseli nuk ka pranuar ftesë tjetër për intervistim nga Prokurori dhe se intervistimin e njëjtë e ka kryer në dhjetor të vitit të kaluar. Bytyçi tha po ashtu se kryetari Kadri Veseli do të jetë transparent për çfarëdo lloj çështje që lidhet me Gjykatën Speciale.
Më 24 qershor 2020 në një komunikatë për media, Zyra e Prokurorit të Specializuar publikuan një aktakuzë me dhjetë pika kundër Presidentit Hashim Thaçi dhe kryetarit të PDK’së Kadri Veseli. Kjo aktakuzë ishte dorëzuar pranë Dhomave të Specializuara më 24 prill 2020.
Presidenti i Kosovës, Hashim Thaçi që nga dje është duke qëndruar në Hagë të Holandës ku është e vendosur Gjykata Speciale e Kosovës.
Thaçi është intervistuar dje për më shumë se gjashtë orë nga Prokurori Special, kurse sot ai ka vazhduar sërish intervistimin.
Përkundër se dy ish-udhëheqësit e UÇK’së, Hashim Thaçi dhe Kadri Veseli në aktakuzën e publikuar përmenden së bashku dhe si emra të përveçëm, Veseli nuk udhëtoi për në Hagë me Thaçin.
Zëdhënësi i PDK’së, Avni Bytyçi në një përgjigje për Express tha se Veseli nuk ka pranuar ftesë tjetër për intervistim nga Dhomat e Specializuara dhe të njëjtin intervistim e ka kryer në muajin dhjetor.
“Kryetari Veseli, nuk ka pranuar asnjë ftesë tjetër nga dhomat e specializuara dhe në çfarë do lloj çështje lidhur me Gjykatën Speciale që lidhet me z.Veseli ne do të jemi shumë transparent”, ka thënë Bytyçi.
Organizata e Veteranëve të Luftës së UÇK’së me datë 9 korrik ka organizuar protestë në të gjitha qytetet e Kosovës për të kundërshtuar Gjykatën Speciale duke kërkuar që e njëjta të zhbëhet.
Në aktakuzën e publikuar nga Prokurori Special, Presidenti Hashim Thaçi dhe kryetari i PDK’së, Kadri Veseli akuzohen për më shumë se 100 vrasje gjatë luftës
“Më 24 prill 2020, Zyra e Prokurorit të Specializuar (ZPS) u paraqiti Dhomave të Specializuara të Kosovës (DHSK) një aktakuzë me dhjetë pika për shqyrtim prej Gjykatës, ku Hashim THAÇI, Kadri VESELI dhe të tjerë akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura. Në Aktakuzë pretendohet se Hashim THAÇI, Kadri VESELI dhe të dyshuar të tjerë janë penalisht përgjegjës për afërsisht 100 vrasje të paligjshme. Krimet e paraqitura në Aktakuzë përshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë”, thuhej në komunikatën e Prokurorit Special lidhur me aktakuzën ndaj Thaçit dhe Veselit.
