Me pamje të rënda tash e 4 muaj, përveç stafit mjekësor të Klinikës Infektive, janë duke u përballur edhe pacientët e familjarët që janë në këtë klinikë.
Trajtimin në këtë klinikë tash e dy javë po e vazhdon edhe Ramadan Krasniqi nga Komuna e Prishtinës, i cili është i infektuar me Covid-19.
Ndonëse thotë se është i kënaqur me angazhimin e stafit mjekësor, shoqërimin e familjarëve të personave të infektuar po e sheh si shqetësues, raporton KOHA.
Krasniqi ka apeluar te qytetarët që t’i respektojnë masat dhe ta marrin më seriozisht çështjen e virusit.
Kujdes të shtuar kërkojnë edhe personat të cilët nuk janë të infektuar me Covid-19, por që vijnë për të marrë shërbime të tjera në QKUK.
E Klinika Infektive, tash e disa muaj, është shndërruar në një hapësirë ku shumë qytetarë presin për të ditur gjendjen e familjarëve të vet, por edhe për t’u testuar për Covid-19.
Gjatë kohës sa ekipi i televizionit po qëndronte në oborrin e kësaj klinike, një i burgosur nga rajoni i Prishtinës, nën masa të rrepta të sigurisë, u soll për t’u testuar.
E numri i atyre që presin ndonjë lajm me ditë të tëra për familjarët e tyre është më i madh para objektit të Mjekësisë Sportive, ku gjithashtu trajtohen pacientë të prekur me Covid-19.
Të vështirë e sfiduese po e konsideron punën e vet edhe personeli i Qendrës së Urgjencës, që vazhdimisht asiston personat e dyshuar dhe të konfirmuar me koronavirus nga Komuna e Vushtrrisë.
Nga fillimi i marsit e deri tani, në Kosovë janë konfirmuar 3 mijë 886 persona pozitivë me Covid-19, e prej tyre 82 kanë vdekur.
