Operacioni i policisë në Pejë, arrestohen 11 persona dhe kapet arsenal armësh

Mëngjesin e sotëm, Policia e Kosovës me urdhëresë të lëshuar nga Gjykata Themelore në Prishtinë- Departamenti Special, ka zhvilluar një operacion të gjerë në Rajonin e Pejës.

Aksioni në Pejë nga Drejtoria për Hetimin e Krimit të Organizuar, ka të bëjë me veprën penale trafikim me armë. Kështu ka bërë të ditur për KosovaPress, zëdhënësi i Policisë së Kosovës, Baki Kelani.

“Ju informojmë se sot me datë 29.09.2020, në orët e hershme të mëngjesit, Policia e Kosovës, Drejtoria për Hetimin e Krimit të Organizuar, e asistuar nga njësitë relevante të PK-së, ka filluar me një operacion policorë në Rajonin e Pejës, lidhur me veprën penale, ‘Trafikimi me Armë’”, tregoi Kelani.

Burimet e IndeksOnline brenda policisë kanë thënë se kontrolli i shtëpive dhe objekteve përcjellëse është realizuar në dhjetë lokacione, me përkrahjen e Njësiteve Speciale, K9 dhe disa njësi të stacionit policor në Pejë.

“Gjatë kontrollit, si pronë material janë gjetur dhe sekuestruar: 3 armë të gjata gjysmëautomatike, 6 armë të vogla revole, 2 karikatorë, një palë dylbi, 180 fishekë kalibër indryshëm, 2.000 euro, 2 vetura dhe 12 telefona mobil”, kanë thënë burimet brenda policisë.

Gjatë këtij operacioni janë arrestuar 11 persona të dyshuar të cilët pas intervistimit me vendim të prokurorit special janë dërguar në mbajtje policore për vazhdim të procedurës së mëtejme gjyqësore ndërsa një i dyshuar gjatë kontrollit nuk është gjetur në lokacion andaj i njëjti është në kërkim policor.

Black Friday –  Eja dhe ndaj emocionet e zbritjes ekstreme në Comodita Home

Sponsoruar