Nga Vetëvendosje i kanë reaguar kreut të LDK-së, Isa Mustafa i cili më herët duke i dalë në mbrojtje kryeministrit Hoti në lidhje me deklaratat e partisë së Kurtit, tha se këta të fundit po lënë të kuptohet se përkrahin Asociacionin e Komunave me Shumicë Serbe ashtu siç ishte nënshkruar nga atë kohë kryeministri, Hashim Thaçi dhe rrjedhimisht në bazë të vendimit të Gjykatës Kushtetuese.
Albulena Haxhiu nga Vetëvendosje, me anë të një postimi në Facebook, tha se Mustafa po tenton ta justifikojë veten sa i përket Asoaciacionit të 2015-tës.
Ajo thotë se partia e saj i kundërshton të dy versionet e Asociacionit, atë të 2013-tës dhe atë të 2015-tës.
“Në anën tjetër, Lëvizja VETËVENDOSJE! i ka kundërshtuar e i kundërshton ashpër të dyja. Ne nuk jemi për Zajdenicën e Thaçit sikurse nuk jemi as për atë të Mustafës, sepse ato janë të dyja “Zajednicë” e Serbisë, për të cilën ju kemi paralajmëruar me kohë dhe kundërshtuar fuqishëm. E dimë tash që jeni në sikletin e përpjekjes së tretë, por jeni pa legjitimitet, pa ligjshmëri. Ju mund t’i zotoheni Vuçiqit, po ato zotime vlejnë vetëm për ju”, ka shkruar ajo.
Postimi i plotë:
Zajednica’ është edhe synim edhe kërkesë e Serbisë, të cilën kjo klasë politike ja ka mundësuar si synim dhe normalizuar si kërkesë, herë nëpërmjet të ashtuquajturve “normalizim i marrëdhënieve” e herë si “normalizim ekonomik”.
Aktgjykimi i GJK-së praktikisht hedh poshtë idenë e një “Zajednice” çfarë kanë nënshkruar Thaçi në prill 2013 dhe Mustafa në vitin 2015. Parimisht e prakitikisht mund të thuhet se nuk mund të ketë edhe Republikë edhe Zajednicë. Isa Mustafa që paska reaguar me shumë vrer duke tentuar ta justifikojë vetën se ai i përket ‘Zajednicës’ së 2015-ës ka harruar se edhe atë të 2013-ës e ka mbështetur. Sikurse në shumë pika Mustafa e Thaçi janë vetëm dallim kohor.
Në anën tjetër, Lëvizja VETËVENDOSJE! i ka kundërshtuar e i kundërshton ashpër të dyja. Ne nuk jemi për Zajdenicën e Thaçit sikurse nuk jemi as për atë të Mustafës, sepse ato janë të dyja “Zajednicë” e Serbisë, për të cilën ju kemi paralajmëruar me kohë dhe kundërshtuar fuqishëm. E dimë tash që jeni në sikletin e përpjekjes së tretë, por jeni pa legjitimitet, pa ligjshmëri. Ju mund t’i zotoheni Vuçiqit, po ato zotime vlejnë vetëm për ju.
Sovraniteti dhe unitariteti i Kosovës nuk mund të ndryshohen. Kosova është Republikë.
