Radhë të gjata të qytetarëve çdo mëngjes krijohen para Komunës së Prishtinës për ta tërhequr vërtetimin e tatimit në pronë, si kusht për t’i regjistruar automjetet.
Kjo për faktin se ky shërbim komunal po kryhet me staf të reduktuar si pasojë e pandemisë COVID-19, raporton portali “Front Online”.
Qytetarët që prisnin në radhë për ta kryer këtë shërbim komunal i kanë treguar portalit “Front Online” se duhet që të zgjohen herët në mëngjes për ta tërhequr numrin rendor për pagesën e tatimit në pronë dhe më pas të presin me orë të tëra derisa t’u vie radha për realizimin e këtij shërbimi.
“Kam dalë në ora 7 të mëngjesit me zënë radhën, në mënyrë që në orën 08:30 kur të nisin punën në Komunë për ta tërhequr numrin rendor. Pastaj duhet të presim në radhë për ta kryer këtë shërbim komunal”, thotë një qytetar për “Front Online”, duke shtuar se kryetari i Prishtinës, Shpend Ahmeti, çdo ditë shkruan në rrjete sociale për rrezikun nga COVID-19, ndërsa në Komunën që e udhëheq ai çdo mëngjes grumbullohen dhjetëra qytetarë vetëm për pagesën e tatimit në pronë.
Ndërsa një qytetarë tjetër sqaron se sot ka shkuar në Komunë në orën 13:30, ndërsa u është thënë se nuk ka numra në dispozicion për pagesën e tatimit në pronë, pasi që të njejtit shpërndahen herët në mëngjes.
Për kryerjen e këtij shërbimi komunal së fundi ka vazhdimisht ankesa nga qytetarët, të cilët kanë thënë se po presin me orë të tëra. Kundër këtij kushtëzimi për regjistrimin e automjeteve së fundi kanë dalë edhe Shoqata e Sigurimeve të Kosovës.
Përndryshe, Prishtina është me më së shumti raste aktive me COVID-19.
/Front Online/
