Kryetarja e Dhomës së Përfaqësuesve të Shteteve të Bashkuara, Nancy Pelosi, i ka dhënë zyrtarisht përkrahje kandidatit të Partisë Demokratike për president të ardhshëm të ShBA-së dhe ish-nënpresidentit të këtij shteti, Joe Biden, për zgjedhjet presidenciale të nëntorit.

Ajo theksoi se Biden-i mund ta ndihmojë vendin që të dalë nga kriza e shkaktuar nga koronavirusi. “Në kohën kur po përballemi me koronavirusin, Joe ka qenë një zë i arsyes dhe i rikthimit, me një rrugë të qartë për të na nxjerrë nga kjo krizë”, tha Pelosi përmes një videoje.

Demokratja e Kalifornisë gjithashtu e përmendi përvojën e Biden-it për miratimin e Aktit për Kujdes të Përballueshëm dhe për zbatimin e Aktit Amerikan për Rimëkëmbje dhe Riinvesitme, shkruan “NeW York Post”.

Përkrahja e Pelosi-t për Biden-in erdhi pasi një gjë të tillë më parë e bënë edhe ish-presidenti Barack Obama, senatori Bernie Sanders dhe senatorja Elizabeth Warren.

“Jam krenare që po e përkrah Joe Biden-in për president – një lider që është personifikim i shpresës dhe guximit, vlerave, autenticitetit dhe ndershmërisë”, tha Pelosi.