Ministri i Tregtisë dhe Industrisë, Vesel Krasniqi, nuk ka pritur më shumë se tre muaj për ta shkarkuar nga detyra sekretarin e Ministrisë, Burim Rrecajn, raporton portali “Front Online”.
Në vend të Rrecajt, ministri Krasniqi ka emëruar Gentiana Islamajn, e cila njëherit është drejtore e përgjithshme e Drejtorisë së Akreditimit, thuhet në vendimin që e posedon “Front Online”.
Përndryshe, Rrecajn e kishte suspenduar më herët edhe ish-ministri i Tregtisë, Bajram Hasani, në vitin 2018, të cilin menjëherë e kishte liruar nga detyra edhe ish-kryeministri Ramush Haradinaj.
Por, për shkak të shkarkimit të sekretarit Rrecaj kishin shpërthyer pakënaqësitë tek NISMA për Kosovën në drejtim të ish-ministrit Hasani, i cili më pas ishte shkarkuar nga detyra dhe në vend të tij kishte ardhur ministër Endrit Shala.
Pikërisht për shkak të këtyre përplasjeve me krerët e NISMA-s, të cilën e udhëheq Fatmir Limaj, Bajram Hasani ka braktisur degën e partisë në Gjilan për të kaluar në AAK-në e Ramush Haradinajt.
/Front Online/
