Deklarata e sotme e kryeministrit grek Kyriakos Mitsotakis se Greqia do të zgjërojë nga 6 në 12 milje ujërat territoriale në detin Jon ka rikthyer në Shqipëri debatin e marrëveshjes së detit, e cila disa vite më parë u anualua nga Gjykata Kushtetuese.

Greqia e ka bërë pjesë të agjendës së diplomacisë së saj zgjerimin e ujërave territoriale me 12 milje në Jon me qëllim që ta përdorë si precedent në përplasjen me Turqinë për ishujt në Egje, shkruan abcnews.al.

Mediat greke raportojnë duke iu referuar burimeve diplomatike se “Athina e ka informuar më herët Tiranën në lidhje me vendimin për të zgjeruar me 12 milje ujërat territoriale në detin Jon“.

“Kjo është një e drejtë e jona që duhej ta kishim shfrytëzuar më herët. Gjithçka është kaonform konventave ndërkombëtare dhe në lidhje me këtë janë informuar Tirana dhe Roma“, shkruan “Protothema” duke iu referuar një burimi diplomatik.

Më herët, Mistotakis tha se askush nuk do të mund ta pengonte Greqinë nga kjo e drejtë dhe se gjithçka bëhej konform konventave ndërkombëtare.

Greqia firmosi marrëveshjen e ndarjes së Zonave Ekskluzive Ekonomike fillimisht me Italinë gjatë kësaj vere dhe më pas me Egjiptin duke shkaktuar reagimin e ashpër të Turqisë, e cila më herët kishte firmosur një marrëveshje të ngjashme me Libinë duke ndare mes tyre një pjesë të Mesdheut.

Greqia synon nënshkrimin sa më parë të një marrëveshjeje detare me Shqipërinë me qëllim që kushtet e saj t’i përdorë si precedent përballë Turqisë.