Anëtari i Kryesisë së Partisë Demokratike të Kosovës, Sami Lushtaku thotë se Specialja po godet Presidentin dhe Kosovën politikisht.
Lushtaku në “Debat Plus” ka thënë se personalisht ka qenë kundër Gjykatës Speciale pasi sipas tij Kosova ka pasur Gjykatën e Hagës, UNIMIK-ut dhe EULEX-it.
“Këto gjykata kanë pasur mundësi të arrestojnë apo hetojnë këdo dhe një pjesë të ish-ushtarëve e kanë dënuar e një pjesë e kanë liruar nga aktakuzat përfshirë edhe mua”, tha ai, përcjell Telegrafi.
Ish-kryetari i Skënderajt thotë se Gjykata Speciale nuk ka për qëllim të zbardhë vrasjet në Kosovë por sipas tij ka qëllim të godasë Thaçin dhe Kosovën politikisht.
“Kjo Gjykatë nuk është që t’i zbardh krimet apo vrasjet në Kosovë por që ta godasë Presidentin dhe Kosovën politikisht”
Lushtaku thotë se do të ishte e udhës që Kuvendi i Kosovës ta sjellë në Kosovë Gjykatën Speciale me gjyqtarët dhe prokurorët që janë pasi sipas tij është kosto e madhe për familjet e të dënuarve.
“Familja e ndonjë të akuzuari do të dënohet që të mos mund ta vizitojë familjarin e tyre në Holandë për shkak të shpenzimeve të mëdha”.
Ish-kryetari i Skënderajt thotë se nuk do të dëshironte të ishte në lëkurën e asnjërit prej deputetëve që e kanë votuar themelimin e Gjykatës Speciale në Holandë.
