Kryeministri në detyrë i Kosovës, Albin Kurti, ka thënë se oferta e tij për debat me presidentin, Hashim Thaçi, u prezantua me qëllim për të ulur tensionet.

Kurti, në emisionin Opinion në TV Klan, u shpreh se thirrja e Thaçit për t’i shkuar në shtëpi, “ishte kërcënim publik”.

“Bëhet fjalë për një lloj kërcënimi publik që na bëri presidenti neve. Presidenti na bëri ftesë mua dhe ministrit të Punëve të Brendshme që të shkonim tek shtëpia e tij. Kështu që, unë e bëra këtë ofertë [për debat] që ta nxirrja këtë çështje nga llagëmi për ta trajtuar në një studio televizive”, tha Kurti në Opinion.

Kryeministri në detyrë, përmes një postimi në Facebook javën e kaluar, tha se Thaçi është shembulli më i keq për qytetarët. Po ashtu, Kurti e sfidoi Thaçin edhe për një debat televiziv.

Thaçi më herët e kishte akuzuar VV-në duke e quajtur organizatë kriminale, meqë Qeveria në detyrë kishte folur për dyshimet se presidenti ka ndihmuar Behgjet Pacollin të futej kundërligjshëm në Kosovë.