×
  • Lajme
  • Lajme

    Kryeministri Hoti vizitoi Qendrën Mjekësore të Forcës së Sigurisë së Kosovës

    FrontOnline
    28 Korrik 2020

    Kryeministri i Qeverisë së Republikës së Kosovës, Avdullah Hoti ka vizituar sot Qendrën Mjekësore të Forcës së Sigurisë së Kosovës.

    I shoqëruar nga ministri i Shëndetësisë, Armend Zemaj, kryeministri Hoti fillimisht është pritur në takim nga ministri i Mbrojtjes, Anton Quni dhe komandanti i FSK-së, gjenerallejtënant Rrahman Rama.

    Pasi ka vizituar Qendrën Mjekësore të FSK-së, kryeministri Hoti tha se është këtu bashkë me ministrin e Shëndetësisë, për të takuar ministrin, komandantin e FSK-së dhe gjithë stafin tjetër të FSK-së, ushtarakë, nga të cilët është informuar në detaje për përgatitjet që po bëhen për ngritjen e kapaciteteve të FSK-së.

    “Bashkë me ministrin e Shëndetësisë inspektuam spitalin ushtarak, për të parë kapacitetet që FSK-ja do t’i vërë në dispozicion të qendrës spitalore, në rast se do të kemi nevojë që t’i përdorim ato. Unë nuk jam shumë njeri ushtarak, por jam i impresionuar kur hyj brenda, por edhe i emocionuar me disiplinën ushtarake dhe përgatitjet e Ministrisë së Mbrojtjes, të FSK-së, një disiplinë që na bënë krenarë”, tha kryeministri Hoti.

    Më tej, kryeministri Hoti theksoi se do t’i qëndrojnë afër Ministrisë dhe FSK-së për të ngritur më tutje kapacitetet dhe do të punojnë bashkë me stafin shëndetësor të FSK-së që të integrohen me Ministrinë e Shëndetësisë dhe shërbimin spitalor për të përballuar situatën nëpër të cilën po kalojmë.

    “I falënderova edhe për mbështetjen që dhënë FSK-ja në 3-4 muajt e fundit,  institucioneve të tjera për të menaxhuar situatën, e cila tashmë po duket se po përkeqësohet dhe ne duhet të përgatitemi për të gjitha variantet që mund t’i kemi përpara gjatë javëve dhe muajve të ardhshëm”, tha kryeministri duke falënderuar ministrin Quni, gjenerallejtënant Ramën dhe të gjithë pjesëtarët e FSK-së për këto përgatitje.

    Më pas kryeministri Hoti ka parë nga afër edhe pajisjet e fundit ushtarake të FSK-së, të blera me buxhetin e Kosovës.

    Komandanti i FSK-së, gjenerallejtënant Rrahman Rama e ka njoftuar kryeministrin Hoti për procedurat e pranimit teknik të këtyre pajisjeve dhe shpërndarjen e tyre varësisht nga nevojat, duke thënë se kjo është në vazhdimësi të procesit të ngritjes së kapaciteteve të FSK-së, bazuar në mandat dhe mision të ri.

    Kryeministri Hoti përgëzoi gjenerallejtënant Ramën për punën që po bëjnë, duke theksuar se është mirë që kjo punë po bëhet bashkë me partnerët tanë ndërkombëtarë, por normalisht me buxhet të Republikës së Kosovës.

    “Ne do t’ju qëndrojmë afër edhe në vitet e ardhshme, për të plotësuar nevojat e FSK-së dhe për të zbatuar plotësisht planin afatgjatë të ngritjes së kapaciteteve të FSK-së. Unë jam sot këtu edhe për të demantuar çfarëdo informate që del në mediat ndërkombëtare lidhur me këtë furnizim që ka pasur FSK-ja. Kjo është plotësisht në përputhje dhe në marrëveshje me parterët tanë ndërkombëtarë”, tha kryeministri Hoti. /kp/

    Nga Rubrika
    Lajme31 Maj 2025
    Euguen Cakolli nga KDI ka bërë me dije se sa po i kushtojnë buxhetit të shtetit deputetët, të cilët ende nuk e...
    Lajme31 Maj 2025
    Kreu i ekipit negociator të Serbisë, Petar Petkovic, ka reaguar ndaj një interviste që kreu i ekipit negociator të Kosovës, Besnik Bislimi,...
    Lajme31 Maj 2025
    Lidhja e Bizneseve të Kosovës (LBK) është shprehur thellësisht e shqetësuar me situatën që po mbretëron në mesin e bizneseve të mëdha...
    Të tjera
    Lajme31 Maj 2025
    Trafiku Urban ka njoftuar qytetarët se për shkak të punimeve në rrugën “Enver Maloku” dhe ” Hilmi Rakovica”, sot dhe nesër do...
    Lajme31 Maj 2025
    Deputeti i GUXO-s, Nezir Kraki, ka komentuar situatën e bllokimit të Kuvendit, duke akuzuar opozitën për barrikadim ndaj formimit të komisionit të...
    Lajme31 Maj 2025
    Kandidatja e LVV-së për kryetare të Kuvendit, deputetja Albulena Haxhiu, ka kërkuar nga partitë që në mandatin e fundit ishin në opozitë,...
    Lajme31 Maj 2025
    Deputeti i Lëvizjes Vetëvendosje, Artan Abrashi, ka akuzuar partitë e tjera parlamentare për bojkot dhe sabotazh ndaj procesit të votimit për komisionin...
    Lajme31 Maj 2025
    Kryetari i AAK-së, Ramush Haradinaj, ka përsëritur qëndrimin e partisë së tij se do të votonin një kandidat që partia e tij...
    Lajme31 Maj 2025
    Deputeti i LDK-së, Paris Guri, në seancën e sotme në Kuvendin e Kosovës ka veshur një bluzë me mbishkrim “Fat familjarëve”. Guri...
    -->

    FrontOnline, © 2025 Të gjitha të drejtat e rezervuara.