Komuna e Gjakovës ka hapur procedurën e prokurimit për kontratën publike kornizë “Rrënimi i objekteve pa leje”, por një analizë e Dosjes së Tenderit nxjerr në pah disa kritere teknike dhe profesionale që ngrenë pikëpyetje serioze nëse janë proporcionalisht të nevojshme për realizimin e kontratës apo nëse, në praktikë, mund ta ngushtojnë konkurrencën mes Operatorëve Ekonomikë. Tenderi mban numrin e prokurimit 632-26-6711-2-1-1, ndërsa procedura është përgatitur më 12 gusht 2026 nga Komuna e Gjakovës, raporton portali Front Online.

Ajo që bie në sy nuk është vetëm numri i punëtorëve të kërkuar, por sidomos kombinimi i profileve profesionale, certifikimeve dhe pajisjeve me kufij specifikë të peshës. Sipas Dosjes së Tenderit, Operatori Ekonomik duhet të ketë minimum 10 punëtorë, përfshirë një punëtor të certifikuar për manipulimin e makinerive të rënda dhe një kranist. Por kërkesat nuk përfundojnë këtu. Komuna kërkon gjithashtu një inxhinier të ndërtimtarisë ose infrastrukturës me minimum pesë vite përvojë pas diplomimit dhe me Licencë A, një inxhinier apo bachelor të ndërtimtarisë, hidroteknikës apo konstruktivit me pesë vite përvojë, të certifikuar për menaxhim kantieri dhe menaxhim projektesh, një inxhinier të hidroteknikës, një tjetër të konstruktivit dhe, veçmas, edhe një inxhinier të diplomuar ose master të elektroteknikës me pesë vite përvojë pas diplomimit. Pikërisht këtu ngrihet një nga pyetjet kryesore, pse një kontratë për rrënimin e objekteve pa leje kërkon si kriter eliminues një inxhinier të elektroteknikës me pesë vite përvojë

Edhe ekspert për Vlerësimin e Ndikimit në Mjedis

Një tjetër kërkesë që bie në sy është që njëri nga inxhinierët të jetë i certifikuar për hartimin e raporteve për Vlerësimin e Ndikimit në Mjedis. Kjo kërkesë është veçanërisht interesante për faktin se objekti i kontratës është rrënimi i objekteve pa leje. Dosja, në pjesën e kritereve të stafit, nuk sqaron aty se për cilat raste konkrete operatori do të jetë i obliguar të hartojë një raport të tillë. Nëse hartimi i një VNM-je nuk është pjesë reale dhe e domosdoshme e shërbimit që do të kryhet nga operatori, atëherë lind pyetja nëse ky certifikim është vendosur si nevojë teknike apo si një kusht shtesë që redukton numrin e kompanive të afta për të konkurruar. Kërkesat bëhen edhe më specifike. Një nga inxhinierët duhet të ketë pesë vite përvojë pune dhe njëkohësisht të jetë i certifikuar për menaxhim të kantierit dhe menaxhim të projekteve, ndërsa i njëjti duhet të jetë edhe udhëheqës i punishtes. Pra, nuk mjafton diploma dhe eksperienca profesionale. Komuna ka përcaktuar edhe kombinimin konkret të certifikimeve që duhet ta posedojë personi. Një formulim i tillë mund të ketë efekt kufizues nëse Autoriteti Kontraktues nuk mund ta dëshmojë se pikërisht ky kombinim certifikimesh është i domosdoshëm për kryerjen e kontratës.

Një armatë inxhinierësh për një tender demolimi

Në tërësi, Dosja e Tenderit kërkon profile që përfshijnë: inxhinier të ndërtimtarisë ose infrastrukturës, inxhinier të ndërtimtarisë, hidroteknikës ose konstruktivit për menaxhimin e kantierit, inxhinier të hidroteknikës, inxhinier konstruktiv, inxhinier elektroteknike, ekspert/certifikim për Vlerësimin e Ndikimit në Mjedis, ekspert të Sigurisë dhe Shëndetit në Punë. Pothuajse të gjitha profilet kryesore profesionale kërkohen me së paku pesë vite përvojë. Kombinimi i të gjitha këtyre kërkesave në një kontratë të vetme është pikërisht ajo që mund ta bëjë tenderin problematik nga aspekti i konkurrencës.

Mini-ekskavatori nuk guxon të jetë më i rëndë se një ton

Dyshimet shtohen edhe te pajisjet. Komuna kërkon dy ekskavatorë me peshë minimum 10 ton, tre kamionë kiper me peshë minimum 10 ton, mini-dumper, kamion me kran, skele dhe pajisje të tjera. Por një prej kritereve është veçanërisht specifik: mini-ekskavatori duhet të ketë peshë maksimale prej vetëm 1 ton. Komuna e arsyeton këtë me nevojën për punë në hapësira të ngushta dhe për parandalimin e dëmtimit të gjelbërimit ose infrastrukturës. Megjithatë, mbetet për t’u sqaruar pse kufiri është vendosur pikërisht në 1 ton, dhe jo përmes parametrave funksionalë si dimensionet, gjerësia e makinës, presioni mbi tokë apo aftësia për të punuar në hapësira të kufizuara. / Front Online /