Me ftesë të homologut të tij, sot komandanti i Forcës së Sigurisë së Kosovës gjenerallejtënant Rrahman Rama zhvilloi vizitë zyrtare në Republikën e Shqipërisë.
Kjo vizitë është realizuar në kuadër të planit të bashkëpunimit ushtarak dypalësh midis Forcës Sigurisë së Kosovës dhe Forcave të Armatosura të Republikës së Shqipërisë.
Agjendën e tij, gjeneral Rama me delegacionin shoqërues e filloi me vizitën në Ministrinë e Mbrojtjes, ku me ceremoni dhe nderimet më të larta ushtarake u pritë nga homologu i tij, shefi i Shtabit të Përgjithshëm të Forcave të Armatosura të Republikës së Shqipërisë gjeneral brigade Bardhyl Kollçaku shoqëruar nga stafi i tij më i lartë.
Në Ministrinë e Mbrojtjes, Rama, takimin e parë e zhvilloi me zëvendësministrin e Mbrojtjes, Petro Koçi dhe stafin e tij.
Koçi e njoftoi gjeneral Ramën me zhvillimet kryesore të Ministrisë së Mbrojtjes së Republikës së Shqipërisë, vlerësimin e lartë të nivelit të bashkëpunimit ndërministror dhe ndërushtarak me zotimin për thellim dhe zgjerim të mëtejmë të këtij bashkëpunimi.
Nga ana e tij i pari i FSK-së shprehu falënderime për ftesën dhe mikpritjen.
Ai vlerësoj vlerësoi lart mbështetjen e Ministrisë së Mbrojtjes së Republikës së Shqipërisë dhe instancat tjera shtetërore për mbështetjen e deritashme në të gjitha aspektet me theks të veçantë në aspektin e diplomacisë ushtarake, ku si vend anëtare e NATO-s, Kartës së Adriatikut (A5) dhe iniciativave rajonale të sigurisë dhe mbrojtjes, ka ndikuar shumë në fuqizimin e pozicionit të ministrisë sonë dhe FSK-së në strukturat përkatëse.
Rama zhvilloi takimin me homologun e tij me gjeneral Kollçakun.
Në fillim të takimit, të dy gjeneralët informuan njëri – tjetrin lidhur me zhvillimet e përgjithshme aktuale të forcave, sfidave aktuale të shkaktuara nga kriza e pandemisë COVID-19 si dhe objektivat zhvillimor për të ardhmen.
“Pastaj fokusi i takimit në mes të dy delegacioneve respektive ishte në çështjet kryesore me interes të përbashkët, respektivisht vlerësimin e shkallës së realizimit të Planit të bashkëpunimit ushtarak dypalësh FSK-FARSH, aktivitetet në proces të realizimit si dhe ato të planifikuara për të ardhmen. Gjeneral Rama shprehu mirënjohjen dhe vlerësimin e lartë për mbështetjen e deritashme në të gjitha fushat të FARSH për FSK-në duke shprehur gatishmërinë për vazhdimin e ofrimit të mbështetjes së ndërsjellë nga ana e FSK-së në fushat që vlerësohen nga ana e FARSH. Nga ana e tij, gjeneral Kollçaku, çmoi lart të arriturat e deritashme të FSK-së me theks të veçantë në aspektin e profesionalizimit të burimeve njerëzore dhe shkallës së operacionalitetit të gjitha këto të dëshmuara me sukseset e larta në të gjitha nivelet arsimore-stërvitore të përbashkëta në kuadër të akademive dhe stërvitjeve shumëkombëshe, si dhe në operacionet e realizuara. Në fund të dy u dakorduan për intensifikimin e bashkëpunimit në nivel të mbështetjes së ndërsjellë dhe në nivel të shkëmbimeve të eksperiencave, aftësive dhe kapaciteteve në fushat me interes të përbashkët. Gjatë takimit gjeneral Kollçaku shoqërohej nga drejtori i Drejtorisë së Planifikimit dhe Monitorimit të Mbrojtjes (J-5/8), kolonel Bilbil Bitri, drejtor i kabinetit të tij, Kolonel Arben Zani, oficeri i J5/8, nënkolonel Fredi Maksuti dhe këshilltari i tij politik, Perikli Koliqi”.
Në takim të veçantë, gjeneral Rama u prit edhe nga presidenti i Republikës së Shqipërisë shkëlqesia e tij Ilir Meta i cili shprehu edhe njëherë admirimin e madh për FSK-në dhe besimin e plotë për perspektivën zhvillimore të saj të afërt në strukturat operacionale të NATO-s në misione paqeruajtëse duke fuqizuar rolin e Kosovës në funksion të paqes, sigurisë dhe stabilitetit rajonal e më gjerë.
Gjeneral Rama i ritheksoi mirënjohjen dhe falënderimin për kreun e shtetit shqiptar për mbështetjen e tij të pandërprerë në të gjitha etapat e zhvillimit të forcave ushtarake të vendit nga të gjitha pozitat e tij të lidershipit shtetëror dhe besimin e plotë në rolin dhe angazhimin e njëjtë për FSK-në edhe në të ardhmen. Për këtë arsye edhe simbolikisht i dhuroi uniformën kamuflazh të FSK-së.
Gjatë vizitës dhe takimeve gjeneral Rama u shoqërua nga delegacioni i përbër prej atasheut të Mbrojtjes së Republikës së Kosovës në Republikën e Shqipërisë, kolonel Bashkim Shillova, këshilltarit ushtarak, nënkolonel Berat Shala, zyrtarit për politika dhe marrëdhënie ndërinstitucionale, Ali Bajqinovci si dhe asistentes ushtarake, kapiten Manushaqe Nura.
