Këshilli i Sigurimit i Kombeve të Bashkuara e ka refuzuar një rezolutë të përkrahur nga Shtetet e Bashkuara për zgjatjen e embargos së armëve ndaj Iranit, afati i së cilës mbaron në tetor.

Ky refuzim mund ta shtyjë Uashingtonin që t’i shndërrojë në vepra kërcënimet për prishjen e marrëveshjes bërthamore me Iranin, që do të mund t’i fuste Kombet e Bashkuara në krizë diplomatike, shkruan Free Europe.

Votimi i së premtes për këtë rezolutë pritej të dështonte në organin me 15 anëtarë për shkak të kundërshtimit të fuqishëm nga Rusia dhe Kina, të cilat e kanë të drejtën e vetos.
“Këshilli i Sigurimit i OKB-së sot dështoi që ta mbajë Iranin përgjegjës. Ai ia mundësoi shtetit që është sponsori më i madh i terrorizmit në botë që të blejë dhe të shesë armë vdekjeprurëse dhe i injoroi kërkesat e shteteve në Lindjen e Mesme. Amerika do të vazhdojë të punojë për ta përmirësuar këtë gabim”, tha sekretari amerikan i Shtetit, Mike Pompeo, pas procesit të votimit të rezolutës.

Gjatë votimit të rezolutës, njëmbëdhjetë shtete anëtare të Këshillit të Sigurimit abstenuan, dy e përkrahën atë dhe dy të tjera votuan kundër.

Shtetet e Bashkuara kanë kërcënuar se do ta shtyjnë kthimin e të gjitha sanksioneve të Kombeve të Bashkuara kundër Iranit, nëse dështon votimi i rezolutës për zgjatjen e afatit të embargos për armët. Ekspertët thonë se ky veprim do ta fuste në krizë Këshillin e Sigurimit.