Anëtarët e bordit të përkohshëm të Telekomit të Kosovës, të cilët menaxhohen nga Ministria e Tregtisë, kanë dështuar ta shkarkojnë Bedri Istrefin, kryeshefin ekzekutiv të Telekomit të Kosovës.

Dy anëtarët e bordit të emëruar rreth një muaj më parë nga Qeveria e Kosovës: Luljeta Elezaj dhe Teki Shala, kishin refuzuar të merrnin pjesë në votimin e paraparë të mbahej disa ditë më parë.

Ata kishin refuzuar të krijonin kuorumin e nevojshëm në mbledhjen e bordit të Telekomit.

Për këtë arsye, kryeministri në detyrë, Albin Kurti, i ka shkarkuar Elezajn dhe Shalën nga bordi i përkohshëm i Telekomit të Kosovës.

Siç mëson Insajderi, Elezaj dhe Shala janë të afërt me Lidhjen Demokratike të Kosovës. Shala më parë ka qenë drejtor i Drejtorisë për Buxhet dhe Financa në Gjakovë nga LDK.

Gazeta mëson se Kurti është duke menduar që në vend të tyre të emërojë “njerëz të tij”, në mënyrë që ta shkarkojë menaxhmentin aktual të Telekomit të Kosovës.

Vendimi pritet të merret ditëve në vazhdim.