Tre gra janë shtypur për vdekje nga turma gjatë shpërndarjes së ndihmave ushqimore në kryeqytetin e Sri Lanka-s, Colombo nga dëshpërimi i popullsisë pas shkatërrimit të ekonomisë nga masat e koronavirusit.
Rreth 1,000 njerëz po mbanin radhë jashtë një magazine private për dhuratat e përvitshme të muajit të Ramazanit, tha deputeti i zonës Mujibur Rahman.
Dhuratat me vlerë 1,500 rupi ose rreth 8 dollarë, vlejnë sa rroga ditore e një punëtori.
“Disa njerëz u përpoqën të kalonin pa rradhë dhe kjo bëri që gratë që ishin në krye të turmës të rrëzoheshin dhe u shtypën për vdekje,” tha Rahman për agjencinë e lajmeve AFP.
Nëntë njerëz të tjerë u plagosën rëndë dhe u dërguan në spital, tha ai, duke shtuar se sivjet numri i njerëzve ishte më i madh se zakonisht, në eventin që zhvillohet prej dekadash.
“Njerëzit nuk kanë marrë para prej dy muajsh prej bllokadës së koronavirusit. Ata janë të dëshpëruar dhe kur dëgjuan për donacionet e sotme, erdhën me mijëra”, tha ai.
Biznesmeni që shpërndante ndihmat nuk është emëruar nga autoritetet, të cilat thanë se ai dhe pesë asistentë janë arrestuar për shkelje të rregullave të pandemisë.
