Nënkryetar i AAK-së, Ardian Gjini, pas mbledhjes së kryesisë së kësaj partie, ka thënë se nëse Serbia mbetet palë në vendimmarrje për Ujmanin atëherë Aleanca për Ardhmërinë e Kosovës do të rishikojë qëndrimin e saj në Qeveri.

“Sot Aleanca ka mbajte takim, tema e vetme ka qenë dialogu. Ne përshëndesim të arriturat qe i kemi para vetes. Sidoqoftë ne mendojmë se dialogun si proces duhet ta shohim edhe njëherë. Aleanca do të insistojë që disa detaje, disa elemente qenësore të dialogut të shihen edhe një herë. Për çka do të kemi edhe takime të tjera. Aleanca edhe Haradinaj mendojnë se duhet ta shohim procesin e dialogut, por ju e dini që do të kemi edhe faza të tjera dhe Kosova duhet të përgatitet edhe për faza tjera”, tha Gjini.

Sipas tij nëse Serbia mbetet palë në vendimmarrje bashkë me ne për Ujmanin, atëherë AAK-ja menjëherë e rishikon qëndrimin e vet në Qeveri .

“Kryetari Haradinaj ka tregu që nëse Serbia mbetet palë në vendimmarrje bashkë me ne për Ujmanin, atëherë AAK-ja menjëherë e rishikon qëndrimin e vet në Qeveri edhe nuk do ta mbështetë një marrëveshje të tillë”, ka thënë Gjini.

Për AAK-në është e pranueshme marrëveshja me SHBA-në, por jo tripalëshe ku përfshihet edhe Serbia.

“Kryetari Haradinaj ka insistuar se për Ujmanin mund të kemi marrëveshje bilaterale me SHBA-në, por nuk mund të kemi marrëveshje tripalëshe ashtu që për çfarëdo vendimi për Ujmanin ne ta pyesim edhe Serbinë. Kjo pikë nuk mundet me mbet ashtu siç është”, ka thënë Gjini.

https://www.facebook.com/FrontOnlineMedia/videos/319924782400508/