Gati gjysma e brazilianëve mendojnë se presidenti i vendit, Jair Bolsonaro, nuk ka aspak përgjegjësi për më shumë se 100,000 persona të vdekur nga koronavirusi, që është shifra e dytë më e lartë në botë.
Të dhënat e këtij sondazhi u publikuan të shtunën në gazetën “Folha de Sao Paulo”. Sipas këtyre të dhënave, 47 për qind e brazilianëve nuk e fajësojnë presidentin për numrin e viktimave të pandemisë, ndërsa vetëm 11 për qind e mendojnë të kundërtën.
Brazili e ka gjendjen më të rëndë të pandemisë në botë pas Shteteve të Bashkuara dhe menaxhimi i situatës nga qeveria është kritikuar shumë nga ekspertët shëndetësorë, shkruan Reuters, transmeton Gazeta Express.
Vetë Bolsonaro dhe disa anëtarë të familjes së tij janë prekur nga koronavirusi. Bashkëshortja e tij, Michelle, u infektua në fund të korrikut, ndërsa gjyshja e saj vdiq nga Covid-19 këtë javë.
Djali i katërt i Bolsonaros, Jair Renan, që është 22 vjeç, gjithashtu ka dalë pozitiv në testin për koronavirus, njoftoi nëna e tij në Instagram.
Bolsonaro e ka promovuar përdorimin e një ilaçi të dyshimtë për ta luftuar virusin. Hidroksiklorokina nuk ka dhënë dëshmi se ndikon në parandalimin apo largimin e sëmundjes së re.
