Pak ka rëndësi se qysh i fitoi të hollat nga rroga, lotaria, apo qiraja.

Secili qytetar i Kosovës që ka mbushur 18 vjet do të detyrohet ta plotësojë deklaratën tatimore për të ardhurat e tij personale. Këto të fundit do të tatohen për 10 %, raporton “Front Online”.

Këtë njoftim e dha drejtori i Administratës Tatimore të Kosovës, Ilir Murtezaj, teksa theksoi se 31 marsi është afati i fundit për ta bërë këtë. Për ata që nuk i binden këtij urdhri, ai paralajmëroi edhe ndëshkime. Ngjashëm si për bizneset.

Ekonomistët kosovarë po kërkojnë më shumë qartësi, derisa vlerësojnë se një detyrim i tillë do të jetë barrë shtesë për qytetarët.

“Kanë me pasë edhe shpenzime shtesë duke angazhuar kontabilistë që mos me iu ik afatet edhe qe mos me pasë penallti për ikje të afateve. Duhet me u cek patjetër deklaratat, kush ka me deklaru, pra qytetarët duhet me kanë me specifik, duhet me i njoftu qytetarët më qartë, kush po përfshihet në deklaratë dhe në çfarë mënyre”, u shpreh ekonomisti Imer Raçi për “Front Online”.

Ish-ministri i Financave-ATK-së:  Në çfarë ligji jeni bazuar për këtë lloj deklarimi të pasurisë

Më shumë informata rreth këtij tatimi po kërkon edhe Haki Shatri, ish-ministër i Financave.

“Duhet të sqarohet kjo kërkesë. Të tregohet ligji apo udhëzimi se ku është bazuar. Nëse ka bazë ligjore, duhet me e tregu atëherë se si janë paraparë format, formularët e gatshëm për deklarimin e këtij lloj tatimi”, u shpreh Shatri për “Front Online”.

“Front Online” ka kërkuar më shumë hollësi rreth kësaj teme nga ATK-ja, por nga ky institucion nuk kanë kthyer përgjigje gjatë ditës.

Sipas nenit 7 të Ligjit për Tatimin për të ardhurat personale,  të ardhurat personale nënkuptojnë të ardhurat bruto si pagat, qiratë, pasuritë e paprekshme, pensionet, fitoret në lojërat e fatit si dhe fitimet kapitale./“Front Online”