Zyrtari i lartë për turizëm në Ministrinë e Tregtisë dhe Industrisë, Arian Krasniqi, i cili njëherit është djali i vëllait të ish-kryeparlamentarit Jakup Krasniqit, në nëntor të vitit të kaluar kishte grushtuar sekretarin e kësaj Ministrie, Burim Rrecajn, me ç’rast ishte suspenduar nga puna.
Por, ende pa u bërë një vit i plotë nga ky incident Arian Krasniqi është kthyer në punë në Ministrinë që udhëheq NISMA Socialdemokrate, ku Jakup Krasniqi është kryetar i Këshillit Kombëtar të këtij subjekti politik, derisa Rrecaj është shkarkuar nga pozita e sekretarit në Ministri, raporton portali “Front Online”.
Incidentin në MTI e kishte konfirmuar edhe Policia e Kosovës.
“Një rast sulm ndaj personit zyrtar është raportuar të ketë ndodhur në objektin e një ministrie. Njësitë policore kanë dalë në vendin e ngjarjes si dhe ekipi mjekësor të cilët i kanë dhënë ndihmën zyrtarit të lënduar. Me urdhër të prokurorit rasti shkon në procedurë të rregullt”, thuhej në raportin 24 orësh të forcave të rendit.
Portali “Front Online” i ka dërguar pyetje zyrës për medie të Ministrisë së Tregtisë dhe Industrisë, të cilët nuk kthyer përgjigje zyrtare, por përmes telefonit e kanë konfirmuar kthimin e Arian Krasniqit në punë.
Përndryshe, sekretari Burim Rrecaj më 10 shtator të këtij viti është shkarkuar nga detyra me vendim të ministrit Vesel Krasniqi, derisa në vend të tij është emëruar Gentiana Islamaj, e cila njëherit është drejtore e përgjithshme e Drejtorisë së Akreditimit, thuhet në vendimin që e posedon “Front Online”.
Ministri i Tregtisë e shkarkon sekretarin që e kishte rrëzuar një ministër (Dokument)
