30 banorë të komunës së Istogut po i presin rezultatet e testimeve për COVID-19. Mostrat e tyre janë marrë të shtunën për testim, por ende nuk ka dalë rezultati i tyre. Ata janë testuar si kontakte të tri rasteve të fundit të infektuara me koronavirus në këtë komunë.
Në mesin e personave që po i presin rezultatet për koronavirus, është edhe një edukatore e një çerdheje në Istog.
Një familjar i edukatores ka rezultuar pozitiv në testimet për COVID-19, si pasojë e kësaj, është mbyllur edhe çerdhja në Istog.
Drejtori i Shëndetësisë në komunën e Istogut, Mujë Osmanaj, tha se çerdhja do të qëndrojë e mbyllur deri në marrjen e rezultatit të edukatores.
“Çerdhja është mbyllur pasi një familjar i një edukatoreje ka rezultuar pozitiv me COVID-19. Do të qëndrojnë e mbyllur derisa të marrim rezultatet e testimeve të edukatores”, tha Osmanaj, raporton Gazeta Express
Osmanaj bëri të ditur se që nga e diela, nuk janë marrë mostra të reja në
“Nga dita e diele nuk kemi pasur testime të reja. Jemi në pritje të rezultateve për 30 persona që janë testuar të dielën”, ka thënë Osmanaj.
Ai bëri të ditur se momentalisht në Istog janë 17 raste aktive me koronavirus.
Ndërkohë, nga fillimi i pandemisë COVID-19, në Istog janë konfirmuar 25 raste pozitive.
Nga ta, tashmë janë shëruar 8 persona.
Nga data 8 shkurt deri më 23 qershor, në Laboratorin e Mikrobiologjisë Molekulare në Institutin Kombëtar të Shëndetësisë Publike të Kosovës, janë testuar 22 mijë e 133 persona të dyshimtë me virusin SARS-CoV-2.
Prej tyre, 2 mijë e 268 kanë rezultuar pozitivë.
Nga ta janë shëruar 1 mijë e 108 persona, ndërkaq kanë vdekur 38.
