Vetura, xhipa e kombi.
Këto makina i ka në dispozicion Policia e Kosovës, shkruan “Front Online”.
E krahas tyre edhe të tjera si, kamioneta, autobusë e autoblinda, të cilat varësisht prej natyrës së rasteve, i përdorë në aksionet e saj.
Me to, pjesëtarët policorë shkojnë për të kryer bastisje, arrestime & patrullime në çdo cep të vendit. Shumë shpesh nëpër terrene të vështira malore me baltë. Në situata si këto, papastërtia bëhet e pashmangshme. Këto automjete, kësisoj, me t`u kthyer në bazë duhet t`i nënshtrohen një pastrimi me ujë.
Krejt kjo për të larguar dheun e çfarëdo materiali tjetër, të ngjitur.
Këtë shërbim për Policinë në tri vjetët e ardhshme, të paktën për regjionin e Prishtinës, do ta kryejë kompania “Ajani dhe Adami”.
Megjithatë, kontrata mund të shkëputet edhe më herët – sapo vlera totale e larjes së veturave policore të arrijë në gati 63 mijë euro.
Çmimorja e “autolarjes” së Policisë
Çmimet e larjes dallojnë për secilin automjet, shkruan “Front Online”.
Larja e një veture si kjo që po shihni në foto, brenda e jashtë, Policisë i kushton 4 euro e 40 cent, bazuar në kontratën e tenderit.
Pak më shumë të holla lypen për pastrimin e makinave të llojit “Suv” (xhipat).
5 euro e 70 cent – komplet, shkruan “Front Online”.
Ani pse është më i madh dhe mund të harxhohen më shumë detergjente për të, Policisë shpëlarja e një kombi i del më e lirë sesa ajo e një xhipi.
4 euro e 50 cent për këtë që po shihni në fotografi.
Rrafsh 2 euro bën pastrimi komplet i kamionetës. E ai i autobusit policor, 8 sosh, shkruan “Front Online”.
Çmimi përcaktohet varësisht edhe nga kërkesa e pastrimit.
Ai veç i jashtëm kushton më lirë. Sidoqoftë, vlera monetare hyp kur kërkohet edhe ai i brendshëm.
Veturat policore s`presin në rend për larje
E përdallim prej çmimit, ka një rregull që është e pandryshueshme dhe vlen për të gjitha automjetet njësoj.
Shkaku i natyrës së punës policore, asnjëra nga to nuk guxon të presë në radhë për t`u larë.
Punëtorët e autolarjes, “Ajani dhe Adami” duhet të tregohen të kujdesshëm gjatë komplet procesit të fërkimit, sidomos në përdorimin e detergjenteve në mënyrë që veturave policore të mos u dëmtohet ngjyra./“Front Online”.
