Kryeministrja e Serbisë Ana Brnabic nëpërmjet një opinioni të botuar në Jerusalem Post ka falënderuar Izraelin për mosnjohjen e pavarësisë së Kosovës. Thotë se të dy vendet kanë histori të ngjashme dhe se 200 mijë serb u çrrënjosën në Kosovë.

Izraeli nuk e ka njohur ende Kosovën dhe kjo është një nga arsyet që Serbia po mendon t’i ruajë marrëdhëniet e ngushta me këtë vend në planin politik dhe ekonomik. Kështu shprehet e para e ekzekutivit serb, Ana Brnabic, e cila në një shkrim të botuar në “Jerusalem Post”, falënderon këtë vend për mos njohjen e shtetit të Kosovës.

Kështu Serbia planifikon së shpejti hapjen e një zyre zyrtare në Tel Aviv për të thelluar marrëdhëniet ekonomike dhe politike në mes të dy vendeve.

“Vendimi është gjest mirënjohje për refuzimin e Izraelit për të njohur shpalljen e njëanshme të pavarësisë nga autoritetet në provincën tonë jugore të Kosovës”, shkruan Brnabic.

Thotë se sikurse hebrenjt në shumë vende të botës, serbët vuajtën spastrimin etnik në Kosovë.

“Serbia nuk do ta harrojë kurrë vuajtjen tonë të përbashkët, veçanërisht të 500,000 serbëve dhe 30,000 hebrenjve të cilët u vranë në mënyrat e tmerrshme sadiste nga ustashët fashist kroat në kampet e shfarosjes si ai i Jasenovac”, shkruan ajo për të vazhduar: “ose zhdukjen e përhershme të 200.000 serbëve nga Kosova”.

Izraeli është në grupin e vendeve që ende nuk e konsiderojnë Kosovën si shtet të pavarur. Ato nuk kanë marrëdhënie zyrtare. Ngurrimi i Izraelit për ta njohur Kosovën, siç është shkruar shpesh nga mediat atje, është ndikuar pjesërisht nga frika se shpallja e njëanshme e pavarësisë së Kosovës do të mund të përdorej si precedent në konfliktin mes Izraelit dhe Palestinës.