Kryeministrja e Serbisë, Ana Bërnabiq ka deklaruar të mërkurën se bisedimet në SHBA do të jenë të vështira, por se “Washingtoni para se gjithash merret me ekonominë” dhe se askush nuk mund të mbrojë më mirë sesa Vuçiqi interesat e Serbisë.

“Në këtë aspekt edhe qëndrimi ynë është i ngjashëm me qëndrimin e Ëashingtonit, se duhet të sigurohet bashkëpunimi ekonomik, në mënyrë që njerëzit të jetojnë më mirë”, ka thënë Bërnabiq në intervistën për televizionin serb, “Hepi”.

Ajo ka theksuar se druan që Kosovës nuk i interesojnë fare diskutimet rreth ekonomisë dhe se do të qaset vetëm formalisht.

“Gjithë çështjet tjera politike… mendoj se ato çështje janë përherë të pashmangshme, çfarëdo që të them, nuk dua t’ia bëj më të vështirë presidentit Vuçiq, kam besim të plotë se ai do t’i mbrojë interesat serbe më mirë se kushdo tjetër. Gëzohem që ai është duke na përfaqësuar”, ka thënë Bërnabiqi.

Ajo ka përkujtuar se Vuçiqi pas Washingtonit do të shkojë në Bruksel “për t’i vazhduar ato bisedime”.

“Gjendja është e rëndë, por nëse dikush mund ta nxjerrë maksimumin, atëherë ky është Vuçiqi”, ka theksuar kryeministrja serbe.