Lajme

Bajrami: Koha ta ndryshojmë rregulloren e Kuvendit, të mundësohet votimi në distancë

Bajrami: Koha ta ndryshojmë rregulloren e Kuvendit, të mundësohet votimi në distancë
15:36 | 09 Korrik 2020

Ministrja e Financave e Kosovës, Hykmete Bajrami, ka thënë se është koha që të ndryshohet Rregullorja e Kuvendit e të mundësohet votimi në distancë.

Ajo ka bërë thirrje të bëhet kjo sa më shpejt e të kalohen marrëveshjet ndërkombëtare dhe rishikimi i Buxhetit.

Në një postim të mëhershëm ajo ka thënë se burimet financiare për implementimin e pakos emergjente janë siguruar nga Ministria e Financave, por nuk mund të ekzekutohen pa kalim të rishikimit të Buxhetit.

Postimi i plotë i Bajramit në Facebook:

Është koha ta ndryshojmë Rregulloren e Kuvendit, të votojmë rishikimin e Buxhetit dhe Marrëveshjet Ndërkombëtare. Sot në seancën plenare të Kuvendit të Republikës së Kosovës nuk kaluan marrëveshjet ndërkombëtare për financim të disa projekteve në shumë monetare prej rreth 62 milionë euro. Është tepër me rendësi që sa më parë të ndryshohet Rregullorja e Kuvendit të Republikës së Kosovës në mënyrë që të mundësohet votimi në distancë. Sot, shumë deputetë nuk ishin prezent për shkak të pandemisë, pasi një pjesë e tyre edhe janë prekur me COVID-19. Në këtë situatë të krizës, të ballafaqimit me pandeminë, rishikimi i Buxhetit është jetik për Republikën tonë. Votimi i të gjitha marrëveshjeve ndërkombëtare, sidomos atyre për huamarrje është jetik, për shkak se krijohen mundësi për rimëkëmbje ekonomike dhe përballim të situatës me COVID-19. Secili prej nesh kemi obligim ndaj bizneseve dhe ndaj qytetarëve që këto marrëveshje të votohen. Sepse nga taksat e qytetarëve e të bizneseve paguhen ministrat e qeverisë, deputetët dhe mbi 80 mijë zyrtarë publikë. Të nderuar deputetë, Ju ftoj që ta ndryshoni sa më shpejtë Rregulloren e Kuvendit dhe të votohet rishikimin i Buxhetit. Të votohen marrëveshjet ndërkombëtare dhe të ecim tutje. Vota pro rishikimit të buxhetit dhe marrëveshjeve ndërkombëtare është votë para se gjithash për qytetarët e vendit tonë.

Me rastin e Black Friday, 28 Nëntorit dhe 32 vjetorin e kompanisë, Petrol Company me çmime marramendëse në derivate dhe…

Të tjera