Zyra e Prokurorit të Specializuar ka ngritur aktakuzë ndaj presidentit Hashim Thaçi, si dhe ndaj liderit të PDK-së, Kadri Veseli. Ata janë akuzuar për 100 vrasje të paligjshme ndaj luftës së fundit në Kosovë, raporton Front Online.
Lidhur me ngritjen e kësaj aktakuze, avokati i akredituar nga Dhomat e Specializuara, Artan Qerkini, ka thënë për Front Online, se ata deri në momentin kur shpallen fajtorë, nuk mund të konsiderohen si përgjegjës për vrasjet për të cilat janë akuzuar të dy.
“Fillimisht duhet thënë se ne të gjithë duhet të jemi të kujdesshëm dhe të respektojmë parimin e pafajësisë, për Z. Thaçi dhe Z. Veseli sepse ata janë të pafajshëm derisa me një vendim gjyqësor të formës së prerë, shpallet fajtorë. Nëse nuk shpallet fajtorë ekziston pezullimi në standard të lirisë, së tyre”, ka thënë Qerkini për Front Online.
Qerkini theksoi se ngritja e aktakuzës për presidentin dhe për liderin e PDK-së, ka qenë befasuese
“Në fakt kemi qenë paksa të befasuar me ngritjen e aktakuzës, ndaj presidentit Thaçi, sepse me sa e dimë ne ai nuk është marrë fare në pyetje nga ana e Dhomave të Specializuara, por sido që të jetë aktakuza tashmë është ngritur. Atyre u mbetet që të ballafaqohen me to”, ka thënë ai.
Avokati beson që të dy do të dalin të pafajshëm kundrejt aktakuzës që është ngritur për ta.
“Nga Tribunali i Hagës ka pasur aktakuza edhe në të kaluarën, për Z.Haradinaj dhe z.Limaj, por ja që kanë dal të pafajshëm së bashku me shumë të tjerë dhe shpresojmë që edhe Z.Thaci dhe z.Veseli do të dalin të pafajshëm ndaj të gjitha këtyre akuzave që janë ngritur ndaj tyre”, ka thënë Qerkini. /Front Online
