Institucioni i Avokatit të Popullit në Shqipëri ka përpiluar një hetim të hollësishëm në lidhje me deportimin e shtetasit turk, Harun Çelik, nga ky vend në fillim të këtij viti.
Në përfundim të hetimit, Avokati i Popullit i ka nisur një listë me rekomandime Policisë së Shtetit duke i kërkuar asaj të marrë masa për respektimin e të drejtave të të huajve në Republikën e Shqipërisë, konform me konventat ndërkombëtare dhe legjislacionin vendas.
Avokati i Popullit ka konstatuar problematika në lidhje me procedurat e ndjekura dhe dokumentacionin e përpiluar nga autoritetet e Kufirit dhe Migracionit në Tiranë për rastin e deportimit të shtetasit turk Harun Çelik, ndaj i ka rekomanduar Policisë së Shtetit të kryejë një analizë të hollësishme të tyre, raporton “A2news”.
Po ashtu, Avokati i Popullit ka kërkuar hartimin e një udhëzuesi që do të shërbejë për mbrojtjen dhe respektimin e të drejtave të shtetasve të huaj në Republikën e Shqipërisë nga ana e Policisë së Shtetit.
Avokati i Popullit ka tërhequr vëmendjen që situata të tilla si ajo me shtetasin turk Harun Çelik duhet të mos përsëriten në asnjë mënyrë në të ardhmen.
Harun Çelik është dëbuar në Turqi vetëm pak orë pasi ishte lënë i lirë nga qelia e burgut, pasi ishte dënuar nga Gjykata e Tiranës. Sipas Agjencisë shtetërore turke të lajmeve, Anadolu Agency, e cila në atë kohë kishte postuar edhe një video të ndalimit të mësuesit turk, të cilin Turqia e akuzon për terrorizëm, thuhet se operacioni për ndalimin dhe më pas deportimin e tij në Turqi është bërë nga Shërbimi Informativ Kombëtar Turk, i quajtur (MIT).
42-vjeçari u kap në korrik të vitit të kaluar në Rinas me dokumente false dhe pasi vuajti dënimin që mbaroi me 1 janar, ai në zbatim të ligjit për të huajt, u vendos të dëbohej.
Ndërkohë ishte siguruar edhe vendimi i Gjykatës për dënimin ndaj Harun Çelik, i cili duke përfituar nga pranimi i gjykimit të shkurtuar, ka marrë dënim me 8 muaj e 20 ditë burgim.
Ai kishte përfituar nga ulja e 1/3 së dënimit si pasojë e aplikimit të gjykimit të shkurtuar, ndërsa fillimisht ishte dënuar me 13 muaj burg.
Vuajtja e dënimit për të ka vijuar që në momentin e arrestimit më 8 korrik të 2019.
Vendimi i gjykatës paraqet edhe deklarimet e shtetasit Harun Çelik para autoriteteve shqiptare, ku ai ka pretenduar se, “në vendin ku ai jetonte, në Kazakistan, nëpërmjet të afërmve të tij, ka mundur të lidhet me telefon me një shtetas, i cili quhej Kursat, dhe prej këtij të fundit është marrë përsipër që, kundrejt shumës prej 2000 dollarësh, t’i gjendej një dokument për t’i mundësuar udhëtimin për në Kanada”.
