Tenderët

Ardian Gjini s’pyet për Ligjin, i jep 4 milionë € tender një biznesi të papërgjegjshëm

Ardian Gjini s’pyet për Ligjin, i jep 4 milionë € tender një biznesi të papërgjegjshëm
10:00 | 11 Shtator 2021

Komuna e Gjakovës, e udhëhequr nga Ardian Gjini, ka kohë që po e sfidon Organin Shqyrtues të Prokurimit. Bëhet fjalë për një tender, për të cilin këto dy institutcione po e çojnë “luftë” mes vete tash e 2 vjet.

E para po insiston ta shpërblejë me kontratë, për të cilën ka zotuar mbi 4 milionë euro, kompaninë “Drini”. Kurse e dyta, ngul këmbë se biznesi në fjalë është i papërgjegjshëm për ndërtimin e qarkores – tranziti i ri të qytetit, shkruan “Front Online”.

Komunarët gjakovarë e shpërblyen 5 herë kompaninë “Drini”, derisa të njëjtën OSHP-ja e rrëzoi po kaq herë nën arsyetimin se nuk i plotëson kushtet për fitimin e tenderit.

Tash kur për të 6-n herë ky biznes u shpall përsëri fitues, Gjykata e Tenderëve po e ka të pamundur të marrë ndonjë vendim tjetër – ta kthejë ose jo në rivlerësim tenderin – gjegjësisht ta trajtojë ankesën e kompanisë eleminuese “PE-VLAK-u”. Kjo për shkak se bordi i saj është jo funksional prej 31 marsit të këtij viti.

Ky organ këtë informacion ia ka kumtuar edhe komunës së Gjakovës, që është e interesuar për realizimin e projektit.

“I njoftojmë të gjitha palët në procedurë se në mungesë të bordit është e pamundur vendimmarrje për çfarëdo rasti, përjashtimisht vetëm në rastet kur është e lejuar me rregulloren e punës së OSHP-së”, thuhet në përgjigjen e OSHP-së, e siguruar nga “Front Online”.

E këtë përgjigje të 26 majit 2021, zyrtarët komunalë të atjeshëm e kanë nënkuptuar si të atillë që u mundëson ta vazhdojnë kontratën e lidhur për të 6-n herë me kompaninë “Drini”.

Ndryshe thotë raporti i përpiluar një muaj më vonë, në qershor, nga eksperti shqyrtues i Prokurimit, Daut Retkoceri.

Aty thuhet se veprimi i komunës së Gjakovës është në kundërshtim me përgjigjen e tyre si organ.

E në të gjithashtu konstatohet se komuna ka shkelur 5 nene të Ligjit të Prokurimit, atë për qëllim, barazi, dosje të tenderit, specifikime teknike e njoftim të kriterëve përzgjedhëse.

“Vendimin e autoritetit kontraktues (komunës së Gjakovës) e shohim si një vendim të nxituar me qëllime të caktuar e që shihet prej vendimeve tjera, e që duket e patolerueshme dhe e paprecedent për një institucion shtetëror e që nuk dihet se ku është bazuar ai vendim”, thuhet mes tjerash në raportin e siguruar nga “Front Online”.

Për këtë arsye OSHP i është drejtuar edhe KRPP-së dhe Iniciativës për Proges në Prokurim Publik, ngase vlerëson se bëhet fjalë për një shkelje flagrante nga autoriteti kontraktues.

 

“Drama” 2 vjeçare, fillim e fund

Gjithçka nisi më 19 mars të 2019-s kur edhe u hap tenderi.

Megjithatë, shkaku se disa kompani nuk ishin të kënaqura me specifikat e dosjes së tenderit, ato bëjnë ankesë në OSHP, e cila ua aprovon atë më 12 prill.

Për këtë arsye, por edhe një tjetër të kësaj natyre, komuna e Gjakovës vendos ta anulojë krejt tenderin më 3 maj. Një javë më vonë e rihap atë.

Në mesin e kompanive garuese, fituese e shpall biznesin “Drini Company”.

Me këtë s`u pajtohet garuesja “PE-VLAK-U” e as dy konsorciumet tjera, “Mirusha Copmany” & “Lika Trade InfraPlus” dhe JV “RSM COMPANY” e “RIVIERA” SHPK.

Ato i ankohen zyrës së prokurimit në Gjakovës, e cila ua hedh poshtë ankesat si të pabazuara. E si rezultat i refuzimit, të njëjtat, trokasin në “dyert” e OSHP-së.

Ky organ i thotë “PO” ankesës  së biznesit “PE-VLAK-U”, duke e detyruar Gjakovën ta anulojë tenderin dhe ta rikthejë në rivlerësim, shkruan “Front Online”.

Kur kjo ndodh, fitues në rihapjen e tenderit zgjedhet konsorciumi, “Mirusha Copmany” & “Lika Trade InfraPlus”.

Biznesi tjetër që përsëri aplikon për këtë tender “PE-VLAK-U” riankohet në OSHP. Prapë fiton.

Ankesa e saj konsiderohet e bazuar dhe tenderi rikthehet në ri-vlerësim, për të tretën herë. Kjo ndodh më 7 nëntor të 2019-s.

E 14 ditë prej kësaj date tenderin, komuna e Gjakovës vendos të ia japë kompanisë të cilën OSHP-ja veçse e kishte rrëzuar njëherë, asaj “Drini Company”.

Garuesja “PE-VLAK-U” ankohet dhe e fiton përsëri lëndën në Gjykatën e Tenderëve. Gjakova e kthen tenderin në rivlerësim, shkruan “Front Online”.

Skenar komplet i njëjtë përsëritet edhe muajve në vijim, më 11 mars, 19 maj e 4 shtator të 2020-s. Komuna shpërblen “Drini Companyn”, “PE-VLAK-U” ankohet dhe fiton lëndën në OSHP-. E kjo e fundit detyron Gjakovën ta kthejë në pikën zero lëndën.

Ngjashëm, pa asnjë fije dallimi, situata zhvillohet edhe në 29 mars të 2021-s e andej, ashtu siç u sqarua në fillim.

Komuna e Gjakovës HESHT

Për shpërfilljen e Ligjit të Prokurimit, “Front Online” ka nisur pyetje tash e tri javë në adresën elektronike të komunës së Gjakovës.

Kjo e fundit siç duket ato ia ka përcjell menaxherit të Prokurimit, Faton Gutaj, i cili i rekomandon portalit që pyetjet t`i drejtohen zyrës për informim.

“Ju njoftojmë që për çdo pyetje apo informacion t`i drejtoheni zyrës të informimit në Komunën e Gjakovës”, u shpreh Gutaj.

Në numrin e zyrës për informim nuk është përgjigjur askush, as pas disa tentim thirrjeve.

Ankesat e kompanisë eliminuese “problematike”

Në ankesën e fundit Gjykata e Tenderëve i aprovon si të bazueshme dy pretendime biznesit të eliminuar “PE VLAK-U”.

Së pari, atë se kompania në fjalë në vend të një inxhineri të inxhinerisë mekanike – drejtimi komunikacion me përvojë të paktën 5 vjeçare pas diplomimit – siç kërkohej në dosjen e tenderit – ka paraqitur si inxhinier Besar Krasniqin, që është veç bachelor i komunikacionit rrugor dhe transportit.

E së dyti, atë se “PE VLAK-U” ka dërguar krejt dokumentacionin e nevojshëm, përfshirë autorizimin për trupat ndriçues, ndryshe nga ajo që thuhej në vendimin për eleminim që ajo e mori nga komuna e Gjakovës, shkruan “Front Online”.

Jo vetëm në këtë rast.

OSHP-ja, këtij operatori, i dha të drejtë edhe në 4 ankesat tjera paraprake, të parashtruara për këtë tender, gjë që bënë që tenderi të kthehet disa herë në rivlerësim.

/Front Online/

 

Cilësi, gatim dhe shpërblim

Të tjera