Pe s`po lëshojnë.
Inspektorët bashkë me policët prej të hënës po dënojnë këdo që ecën pa maskë në hapësirën publike.
Megjithatë në Polici thonë se qytetarët që nuk e respektojnë këtë masë të Qeverisë janë veç një pakicë, në krahasim me shumicën që bën të kundërtën..
“Mund te them se mbi 90 % respektohen. Kemi pak qe nuk i respektojmë. Në përgjithësi po respektohen të gjitha masat që janë marrë”, theksoi Shaban Tasholli, nënkryetar i Sindikatës për Front Online.
Por, me shqiptimin e këtyre gjobave nuk po pajtohen juristët.
Gzim Shala nga Instituti Kosovar për Drejtësi, thotë se ato nuk kanë bazë ligjore.
“Qeveria e Republikës së Kosovës ka caktuar masa të cilat nuk janë të parapara me ligj, dhe për këtë arsye, as gjobat nuk janë ligjore”, tha ai për Front Online.
Gjobat ndaj qytetarëve, sipas tij, do të vlenin vetëm në rast të miratimit të Ligjit për Parandalimin dhe Luftimin e Pandemisë COVID-19.
Por, derisa kjo çështje të rregullohet, policia do të vazhdojë ta bëjë punën e saj.
Tash zyrtarët policorë do të kenë më shumë punë dhe angazhim.
Kjo meqë orari i punës iu ka ndryshuar. Ai iu është zgjatur për 4 orë më tepër.
Nga e marta, ata po punojnë 12 dhe jo 8 orë në ditë siç bëjnë zakonisht.
“Tash është rrit numri i rasteve me pandemi dhe për këtë arsye te jemi më shumë në vende ngjarje, të kemi më shumë siguri për qytetarët është bërë ky orar”, theksoi nënkryetari i Sindikatës së Policisë, Shaban Tasholli për Front Online.
Ndryshimi i orarit nuk është diçka e re me të cilën përballen pjesëtarët e policisë.
Ata, mu për të njëjtat arsye, kishin punuar me një orar të këtillë të tej zgjatur edhe më herët gjatë këtij viti kur shpërthyen rastet e para me COVID-19.
Si në herën e parë, ashtu edhe kësaj here orët shtesë, nënkryetari i sindikatës së Policisë, Shaban Tasholli, thotë se policëve do t`u kompensohen në dy forma, përmes pagesës apo ditëve të pushimit.
“Deri në 60 orë është me pagesë, mbi 60 orë mund të ketë kompensim. Si përpara në fund të muajit do të paguhen”, theksoi Tasholli për Front Online.
