Deputeti nga radhët e AAK-së, Ali Berisha, në një prononcim për portalin FrontOnline, ka folur për mundësinë e mbajtjes së një tryeze në të cilën do të diskutohet zgjedhja e presidentit të  vendit.

Ai tha se ende nuk kanë vendosur se a do të jenë pjesë e tryezës të propozuar nga kryetari i LDK-së, Isa Mustafa.

Berisha tha se vendimi për të marrë pjesë në tryezë do të merret në parti.

“Këto qëndrime do të merren në parti dhe bazuar në nevojën që institucionet e Kosovës të vazhdojnë dhe Kosova të ketë presidentin, atëherë unë besoj se AAK do të jetë pjesë e takimeve. AAK-ja e ka bërë një veprim adekuat, ku ka një të nominuar për president dhe besoj që edhe në ato takime ne do t’i mbrojmë qëndrimet tona”, tha ai.

Ndërsa i pyetur se a do të heqin dorë nga propozimi i tyre për president, në mënyrë që vendi të mos shkojë në zgjedhje, ai tha se AAK-ja tashmë e ka qëndrimin e saj dhe se nuk do të heqin dorë.

“AAK e ka qëndrimin e qartë d.m.th. e ka qartësuar me kohë që deputetët e AAK-së në Kuvend për president do ta votojnë vetëm kandidatin e AAK-së, Ramush Haradinanj”.

Ditëve të fundit në media është raportuar se ka një përafrim ndërmjet AAK-së dhe LVV-së, lidhur me këtë deputeti Berisha për FrontOnline, tha se deri me tani nuk kanë pasur asnjë takim zyrtar me LVV-në për të diskutuar për çështjen e presidentit.

“Takimet individuale bëhen çdo ditë pasi që deputetet e dy partive takohen mes vete, por takime zyrtare nuk e di që ka pasur që të trajtohen këto çështje. Ne kemi pasur bashkëpunim në të kaluarën me LVV-në. Mendoj që AAK-ja e ka qëndrimin  e qartë që nuk është përjashtuese për asnjë parti politike”,  deklaroi ai.