Nga sot punëtorët teknik të disa shkollave fillore dhe të mesme në kryeqytet do të punojnë vetëm me nga 2 orë gjatë orarit të punës, ndërsa një pjesë tjetër do të qëndrojnë në vendet e tyre të punës dhe nuk do të japin shërbimet e tyre.
Krejt kjo po ndodh për shkak që Komuna e Prishtinës pas procedimit të tenderit për shërbime në mirëmbajtjen e shkollave me pagë neto 300 euro për këta punëtor, ka ndryshuar shumën e pagave duke ulur në 250 euro.
Kështu ka bërë të ditur kreu i Sindikatës së Punëtorëve të Sektorit Privat, Jusuf Azemi.
Azemi tha se krejt kjo është një shkelje ligjore.
“Që nga sot do të punojnë vetëm nga 2 orë gjatë orarit të punës, pjesën tjetër do të qëndrojnë në vendet e tyre të punës dhe nuk do të japin shërbimet e tyre. Kjo pasi që Komuna e Prishtinës pas procedimit të tenderit për shërbime në mirëmbajtjen e shkollave me pagë neto 300 euro për disa punëtor teknik të disa shkollave, ndryshon shumën e pagave të punëtorëve dhe procedon me 250 euro, qa është shkelje ligjore”, theksoi Azemi.
Kreu i kësaj sindikate njoftoi se nëse nuk kthehet shuma e proceduar si në fillim, punëtorët do të largohen nga puna.
Azemi shtoi se kanë dërguar padi për këtë çështje në Komunën e Prishtinës.
“Nëse nuk e ndryshojnë këtë çështje e të mbetët paga 250 euro të gjithë punëtorët do t’i lirojnë vendet e tyre të punës dhe do të punojnë diku tjetër sepse nuk punohet me këtë pagë. E kemi bërë edhe një padi në Komunën e Prishtinës për këtë shkelje ligjore drastike”, u shpreh Azemi.
Ndryshe, Sindikata e Punëtoreve të Sektorit Privat lidhur me këtë çështje dje është takuar me punëtoret teknik të shkollave në Prishtinë “Dardani”, “Gjergj Fishta”, “Pjetër Bogdani”, “Ismail Qemali”, “Naim Frashëri”, “Asim Vokshi”, “Mehmet Gjevori”, dhe shkollat e mesme Ekonomia dhe Bujqësia, shkruan Front Online.