“Duke deklaruar se Krimea nuk do të jetë më Ukrainë, presidenti kroat Zoran Milanoviç vuri në pikëpyetje integritetin territorial të Ukrainës dhe ne e konsiderojmë këtë të papranueshme”, shkroi sot në Facebook Oleg Nikolenko, zëdhënës i Ministrisë së Punëve të Jashtme.

“Pyes veten nëse Zoran Milanoviç mund të bëhej president i vendit të tij me një retorikë të tillë në vitet 1990, kur Kroacia po luftonte për të ruajtur shtetësinë e saj? A do të pranonin votuesit e tij të mbyllnin sytë ndaj pushtimit të një pjese të vendit të tyre?”, ka shkruar Nikolenko.

Presidenti kroat Zoran Milanoviç tha dje në Petrinja se “Krimeja nuk do të jetë më Ukrainë”, duke aluduar se bashkësia ndërkombëtare tashmë ka krijuar një precedent të tillë me Kosovën. Rusia aneksoi Krimenë në vitin 2014.

Në postimin e tij, Nikolenko kujtoi se “Kroacia mund të kishte humbur një të tretën e territorit të saj për shkak të agresionit të jashtëm” dhe shtoi  se megjithatë, falë luftës heroike, kroatët arritën të mbrojnë pavarësinë e vendit të tyre”.

“Ne i konsiderojmë të papranueshme deklaratat e presidentit të Kroacisë, i cili në fakt vuri në dyshim integritetin territorial të Ukrainës”, theksoi zëdhënësi i Ministrisë së Punëve të Jashtme të Ukrainës. Ai e përfundoi njoftimin duke falënderuar qeverinë kroate dhe popullin kroat për mbështetjen e palëkundur ndaj ukrainasve në luftën kundër agresionit rus./FrontOnline/