Në pasditën e sotme do të fillojë kompeticioni më i madh i futbollit në botë, Kampionati Botëror “Katar 2022”, raporton FrontOnline.

Për herë të parë, Kupa e Botës mbahet në këtë periudhë kohore, pra në dimër, natyrisht shkaku i temperaturave të larta në Katar.

Ndeshja hapëse do të zhvillohet sot nga ora 17:00 mes kombëtares nikoqire, Katarit dhe Ekuadorit, ndeshje e vlefshme për grupin A.

Për organizimin, sigurinë si dhe disa rregulla të vendosura, ka pasur shumë akuza dhe kritika.

Tashmë, për këtë garë, ka folur edhe kryetari i AKR-së, Behgjet Pacolli.

Deputeti i Kuvendit të Kosovës ka përgëzuar megjithatë Katarin për organizimin si dhe ka shprehur mirëkuptim për rregullat e vendosura, teksa zbulon se është i ftuar nga autoritetet.

Shkrimi i plotë i Pacollit në “Facebook”:

“Sot në Katar zhvillohet Kupa e Botës në futboll, një vend i bukur dhe i rregulluar. Shumë personalitete po flasin negativisht për vendin dhe bëjnë thirrje për bojkot të ngjarjes. Katari ka rregullat e veta, dhe kushdo që dëshiron është i mirëpritur, askush nuk është i detyruar të vizitojë vendin. Unë jam mysafir i ftuar dhe kam pranuar ftesën e autoriteve. Në këtë kampionat, unë bëj tifo për Zvicrën me kapitenin e ekipit, Granit Xhaka“./FrontOnline/