Një person me banim në Gjilan ka deklaruar në polici se në shtëpinë e vëllait të tij, të cilën e ka nën mbikëqyrje, persona të panjohur kanë depërtuar me dhunë brenda ku kanë vjedhur vegla të ndryshme pune, një telefon ”samsung’’, këpucë të ndryshme, atlete sportive dhe sende të tjera.

Njësiti i hetimeve nga Stacioni Policor i Gjilanit, përmes rrugëve operative ka arritur të sigurojë informata kredibile  se ketë vjedhje ka mundur ta ketë kryer i dyshuari A. S. (2001), banues në Gjilan.

“Me urdhër të  dhënë nga gjyqtari i procedurës paraprake për krime të përgjithshme dhe në bashkëveprim  me prokurorin e shtetit për krime të përgjithshme në Gjilan, më datën  24 maj 2022 është kontrolluar shtëpia dhe objektet përcjellëse të të dyshuarit ku  gjatë kontrollës janë gjetur dhe sekuestruar përkohësisht dëshmi të cilat ndërlidhen me rastin e lartshënuar si: atletet sportive dhe disa vegla të punës, orë dore dhe gjësende të tjera. Po ashtu janë gjetur dhe  sekuestruar edhe disa gjësende të tjera të cilat dyshohet se ndërlidhen me disa raste të vjedhjeve të rënda të cilat raste janë nën hetime aktive”, njofton policia, transmeton Gazeta Express.

Me vendim të lëshuar nga prokurori i çështjes, të dyshuarit i caktohet masa e ndalimit për 48 orë.

Rasti është duke u hetuar.