Gjykata e Apelit sot e ka aprovuar si të bazuar vendimin e Gjykatës Themelore në Prishtinë për shtyrjen e tarifave të reja të energjisë nga Zyra e Rregullatorit të Energjisë.

Në njoftimin e Gjykatës së Apelit, thuhet se ankesa e ZRrE-së është refuzuar si e pabazuar, teksa në njoftim thuhet se gjykata gjithashtu gjeti se shtyrja e ekzekutimit të vendimit nuk është në kundërshtim me interesin publik.

“Përkundrazi, shtyrja e ekzekutimit të këtij vendimi, më së shumti i shërben ruajtjes së interesit publik, përkatësisht të interesit të ekonomive familjare në Kosovë si konsumatorë shumicë të shfrytëzimit të energjisë elektrike”, thuhet në njoftimin e Gjykatës së Apelit.

Lidhur me këtë aktvendim të Apelit, FrontOnline ka kërkuar përgjigje edhe në Zyrën e Rregullatorit të Energjisë (ZRrE), se cilët do të jenë hapat e këtij dikasteri tash e tutje.

Nga ZRrE-ja, kanë thënë se tashmë e kanë pranuar aktvendimin e Apelit, dhe se do të ndërmarrin veprime për zbatimin e këtij aktvendimi.

“Sot pasdite, ZRrE-ja e ka pranuar aktvendimin e Gjykatës së Apelit dhe brenda afateve të përcaktuara ligjore do të ndërmerr veprime për zbatimin e këtij aktvendimi”, thuhet në përgjigjen e ZRrE-së, për FrontOnline.

I gjithë procesi në Gjykatë nisi pas padisë së ngritur nga Partia Demokratike e Kosovës, me arsyetimin se shtrenjtimi i rrymës dëmton qytetarët e vendit.

Kështu, më 9 prill Gjykata mori vendim për pezullim, por pavarësisht kësaj, qytetarët e Kosovës edhe këtë në muajin prill janë faturuar me çmime të rritura.

ZRRE-ja, duke u thirrur në Ligjin për konfliktet administrative, pati deklaruar se “aktvendimi i shkallës së parë nuk bëhet i formës së prerë dhe praktikisht nuk është i plotfuqishëm dhe i ekzekutueshëm”.

ZRRE-ja, në vazhdën e krizës globale energjetike, ka miratuar faturat me rritje më 8 shkurt, të cilat ka thënë se do të jenë të vlefshme deri më 31 mars, 2023.

Me këto tarifa, konsumatorët që shpenzojnë mbi 800 kilovatë rrymë në muaj, paguajnë më shtrenjtë./FrontOnline