Zëvendëskryeministri Besnik Bislimi i ka quajtur rrenca deputetët e partive opozitare në seancën ku po debatohet për shtrenjtimin e rrymës në Kosovë.

“Mos rreni. U mytem t`u ju thanë mos rreni në foltore. Ju prapë po dilni po rreni”, u shpreh Bislimi.

Reagimi i tij erdhi pasi Shefi i GP të AAK-së, Besnik Tahiri, ka dalë në foltoren e Kuvendit me laptopin e tij për ta shpjeguar çmimin që pritet të rritet e që do të jetë e barabartë me Italinë sipas EUROSTAT-it.

“Po del ministrja me laptop e duhet me dalë edhe unë me laptop, këtu janë të dhënat e EUROSTAT-it, këtu e ke çmimin e Kosovës sot je e barabartë me Italinë, nuk është mirë me thanë që na po e rrisim prej 6 centve në 22 cent barabart me Italinë. Mos dilni me thanë të pavërteta”, tha Tahiri.

Pasi morën epitetin gënjeshtar, me rrahje të tavolinës partitë opozitare ia kanë ndërprerë fjalën zëvendëskryeministrit Besnik Bislimi.

Ai ka akuzuar partitë në opozitë se po manipulojnë me shifrat për ngritje të çmimit të rrymës.

Pas fjalimit, kryeparlamentari Glauk Konjufca kërkoi respekt brenda Kuvendit e shtoi se nuk ia propozon askujt fjalët e tilla.