Një shpërthim me bombë ndaj një autobusi ushtarak në pjesën qendrore të Damaskut ka lënë të vdekur së paku 13 persona, thonë mediet shtetërore siriane.
Automjeti ishte cak i dy pajisjeve shpërthyese përderisa po kalonte nën urën “Jisr al-Rais” pak pas agimit, raportoi agjencia e lajmeve “Sana”.
Ndonëse Siria është zhytur në luftë civile për një dekadë, sulme të tilla janë gjithnjë më të rralla në kryeqytetin sirian, shkruan BBC, transmeton Gazeta Express.
Raportohet se në verilindje të Sirisë, pjesë e kontrolluar nga rebelët, të shtënat ushtarake me predha lanë të vdekur së paku tetë persona pak kohë pas sulmit ndaj autobusit.
Disa nxënës ishin në mesin e viktimave nga sulmi në qytezën Ariha, në provincën e Idlibit, sipas Vëzhguesit Sirian për të Drejtat e Njeriut, grup vëzhgues me seli në Britani të Madhe.
Idlibi është bastioni i fundit i rebelëve dhe grupeve të xhihadistëve, të cilët janë përpjekur që nga viti 2011 për ta rrëzuar nga pushteti presidentin Bashar al-Assad.
Sipas Kombeve të Bashkuara, lufta në Siri ka shkaktuar së paku 350.000 viktima, ndërsa gjysma e popullsisë është detyruar të zhvendoset, përfshirë gjashtë milionë refugjatë jashtë vendit.