Tri qytete zvicerane renditen ndër më të shtrenjtat në botë në një sondazh të ri ndërkombëtar. Ja pse është kështu

Cyrihu, Gjeneva dhe Berna janë ndër qytetet më të kushtueshme në botë për banorët ndërkombëtarë, sipas Renditjes së Qytetit për Koston e Jetesës më 2021, të lëshuar nga Mercer.

Cyrihu është në vendin e katërt, Gjeneva në të tetin dhe Berna në të 10-ën. Mercer u përqendrua posaçërisht tek punonjësit ndërkombëtarë, shkruan The Local, transmeton albinfo.ch.

“Renditja demonstron se si luhatja e monedhës dhe zhvendosja e çmimeve të mallrave dhe shërbimeve mund të ndikojnë në fuqinë blerëse të punonjësve të huaj”, tha kompania.

Renditja e 209 qyteteve mati koston krahasuese të më shumë se 200 artikujve, duke përfshirë strehimin, transportin dhe ushqimin.

Ndërsa vendndodhjet zvicerane nuk u vendosën në majë, ndryshe nga studimet e tjera të ngjashme, Zvicra është i vetmi vend që ka tri nga qytetet e saj të listuara në 10 qytetet më të kushtueshme.

A është Zvicra vërtet kaq e shtrenjtë?

Është e vërtetë që çmimet për shumë mallra dhe shërbime janë jashtëzakonisht të larta këtu. Ndërsa zviceranët janë mësuar pak a shumë me të, veçanërisht ata që kanë paga përkatësisht të larta, për njerëzit që vijnë nga jashtë, kostot e larta këtu janë tronditja e fundit kulturore, përcjell tutje albinfo.ch.

Studime të ndryshme kanë treguar herë pas here se konsumatorët zviceranë paguajnë shumë më shumë për mallrat dhe shërbimet themelore sesa homologët e tyre evropianë, me përjashtim të Norvegjisë dhe Islandës.

Për shembull, një studim i tillë zbuloi se njerëzit në Zvicër duhet të paguajnë 168 franga për një shportë të mallrave të konsumit që kushton mesatarisht 100 euro në BE.

Disa shërbime janë gjithashtu më të kushtueshme se në vendet e tjera, përfshirë primet vjetore të sigurimeve shëndetësore, strehimin (veçanërisht në qytetet e mëdha) dhe transportin publik.

Pse janë qytetet zvicerane – dhe Zvicra në përgjithësi – kaq të kushtueshme nga krahasimi ndërkombëtar?

Ka shumë arsye për këtë fenomen.

Ndër ato që përmenden më shpesh janë proteksionizmi dhe mungesa e konkurrencës, të cilat janë të ndërlidhura, pasi e para çon pa dyshim te e dyta.

Proteksionizmi tregtar është një politikë që mbron industritë vendase nga konkurrenca e huaj. Kjo do të thotë që produkte të caktuara zvicerane nuk kanë konkurrentë të huaj që garojnë për vëmendjen e konsumatorëve dhe që detyrohen të ulin çmimin.

Sidoqoftë, ekziston edhe një arsye tjetër.

Një studim nga Universiteti i Shkencave të Zbatuara të Zvicrës Veriperëndimore tregon se prodhuesit dhe furnizuesit e huaj imponojnë rritje të mëdha çmimesh në Zvicër, duke shfrytëzuar pagat e larta dhe fuqinë blerëse të konsumatorëve.

Kjo do të thotë që blerësit zviceranë po paguajnë më shumë për blerjet e tyre me më shumë se tre miliardë franga, zbuloi studimi.

Kjo është arsyeja pse kaq shumë njerëz që jetojnë në rajone kufitare shkojnë për të bërë pazar në Francë, Itali dhe Gjermani, ku të njëjtat artikuj janë dukshëm më të lirë.

Kjo praktikë është e përhapur edhe në tregtinë elektronike.

Kushdo që dëshiron të porosis diçka në internet nga një dyqan i huaj shpesh ridrejtohet në faqen zvicerane të furnitorit, ku çmimet shpesh janë shumë më të larta. Kjo quhet “gjeo-bllokim”.

Po Cyrihu, Gjeneva dhe Berna? Pse janë kaq të shtrenjta?

Një shpjegim mund të jetë se, të paktën në rastin e Cyrihut dhe Gjenevës, ato janë dy qytete më të mëdha në Zvicër, ku gjenden më shumë mundësi punësimi – jo vetëm për banorët zviceranë, por edhe për shtetas të huaj.

Studiuesit nga Universiteti i Gjenevës gjetën përqendrimet më të mëdha të njerëzve në dhe përreth qyteteve të mëdha, të cilat janë afër qendrave ekonomike dhe mundësive të punësimit – të tilla si brigjet e Liqenit të Gjenevës ose Liqenit të Cyrihut.

Berna është një qytet më i vogël por, si kryeqyteti i vendit, tërheq gjithashtu të ardhur nga jashtë, veçanërisht ata që punojnë në misionet e huaja diplomatike.

Një shpjegim tjetër pse qytetet kryesore të Zvicrës janë më të kushtueshme për të jetuar është se dendësia më e lartë e popullsisë rrit çmimin e tokës, që do të thotë që kostot e qirasë janë më të larta.

Në të tre qytetet, qiratë mujore për një apartament me katër dhoma janë, mesatarisht, mbi 2,000 franga. Jashtë qyteteve të mëdha dhe në zonat rurale, ky çmim është shumë më i ulët, përcjell tutje albinfo.ch.

Pra, sa kushton të jetosh në qytetet më të shtrenjta të Zvicrës?

Çmimit të qirasë, ju duhet të shtoni koston e sigurimit shëndetësor, i cili ndryshon bazuar në llojin e mbulimit që zgjidhni, si dhe moshën tuaj.

Ekziston edhe kostoja e transportit publik, shërbimeve komunale, ushqimit dhe shërbimeve të tjera që mund t’ju duhen, si kujdesi për fëmijët.

Këto lidhje japin një pasqyrë të mirë të kushtimeve për të jetuar në Cyrih, Gjenevë dhe Bernë.

Por ka edhe disa lajme të mira.

Ndërsa kostoja e jetesës është e lartë, edhe pagat mesatare janë të larta

Kjo tabelë tregon se qytetet zvicerane, përfshirë Cyrihun, Gjenevën dhe Bernan, renditen midis atyre me fuqi të lartë blerëse.