Me reduktime të ujit tash e disa ditë po përballen banorët e kryeqytetit, por edhe ata të rrethinës e veçanërisht Fusha Kosova, raporton Front Online.
E kjo po vjen si pasojë e turbullirave të shkaktuar në kanalin e Ibër Lepencit. Këtë e ka konfirmuar për Front Online zëdhënësja e KRU Prishtina, Arjeta Mjeku.
Ajo tha se reduktimet e ujit ( me orar të planifikuar)po ndodhin si pasojë e turbullirës në kanalin e Ibër Lepencit .
“Për shkak të situatës së krijuar së fundmi nga niveli i lartë i turbullirës në kanalin e Ibër Lepencit, kanal prej të cilit merret uji i pa përpunuar për t’u trajtuar pastaj për pije ( ITUP Shkabaj/ që si pasojë është jashtë funksionit), e kemi të pamundur trajtimin e ujit për pije konform standardeve dhe teknologjisë që posedojmë”, ka thënë Mjeku.
Mjeku ka treguar edhe për reduktimet me të cilat do të përballen banorët e disa lagjeve në Prishtinë.
“Nga ora 11:00-16:00 me reduktime nga dita e sotme do të jenë: Bregu i Diellit, banesat e bardha, Mati 1, Zllatari, Kolovica, Sofalia, Tasligje, Ulpiana, Kodra e Trimave, Arbëria, Lagjja e Spitalit, lagjja e Universitetit, Konviktet, Hajvalia, Graëanica dhe Veterniku. Ndërsa duke filluar nga ora 12:00-16:00, reduktime të ujit do të kenë vetëm pikat e larta të qendrës së Prishtinës, Dardania , Lakrishtja, lagjja Pejton dhe Kalabria. Ndërsa, me reduktime nga ora 11:00-17:00 do të jenë të gjitha fshatrat që gravitojnë përgjatë gypit magjistral Albanik-Podujevë”, ka thënë ajo.
E reduktimi në Prishtnë po vjen, sipas Mjekut, për t’i siguruar furnizim edhe Fushë-Kosovës e cila është më e prekura nga ky “turbullim” i ujit.
“Kjo po realizohet për t’iu mundësuar furnizim zonave më të prekura nga turbullira e ujit në kanalin e Ibrit, me theks të veçantë për Fushë Kosovën”, është shprehur Mjeku për Front Online.
Kjo gjendje do të vazhdojë deri në largim të kësaj turbullire nga kanali i Ibrit.
“Derisa të largohet turbullira e lartë nga kanali i Ibrit, pra derisa kushtet lejojnë kthimin e gjendjes së mëparshme për trajtim e furnizim”, ka thënë Mjeku për Front Online.
Qytetarët janë ankuar për shkak të reduktimeve të shpeshta në rajonin e Prishtinës, gjë që nuk ndodhë vetëm gjatë muajve të verës, por edhe në raste si këto tani./Front Online.
