Është arrestuar zyrtari policor i cili kishte plagosur një person në Graçanicë, shkruan Front Online.
Këtë e ka konfirmuar Policia e Kosovës me arsyetimin se në këtë rast nuk janë plotësuar kushtet ligjore për përdorimin e armës së zjarrit nga zyrtari policor.
Ndryshe, pak minuta më herët Policia për Front Online ka jep detaje se plagosja e personit ka ndodhë me qëllim të parandalimit të arratisjes së tij.
Policia jep detaje për plagosjen e një personi nga zyrtari i saj
Njoftimi i plotë:
Arrestohet zyrtari policor që përdori armën zyrtare sot në Graçanicë Hajvali
/Prishtinë, 22 Dhjetor 2020
Hetuesit e IPK-së kanë vazhduar të ndërmarrin veprime hetimore lidhur me rastin e përdorimit të armës së zjarrit nga një zyrtar policor sot në orët e mbrëmjes në Graçanicë.
IPK në koordinim me prokurorin kujdestar dhe disa njësi të tjera të policisë ka përfunduar këqyrjen e vendit të ngjarjes.
Zyrtari policor i cili ka shtënë me armë zyrtare (i stacionit policor të Graçanicës) me vendim të prokurorit është arrestuar nga IPK dhe të njëjtit i është caktuar masa e ndalimit për 48 orë me dyshimin se i njëjti ka kryer veprën penale “shkaktim i rrezikut të përgjithshëm”, kurse IPK ka rekomanduar edhe suspendimin e tij si pjesë e procedurave administrative.
Bazuar në hetimet paraprake, hetuesit e IPK-së dyshojnë se në këtë rast se nuk janë plotësuar kushtet ligjore për përdorimin e armës së zjarrit nga zyrtari policor duke gjuajtur në drejtim të veturës në lëvizje ku ndodhej i dyshuari por edhe dy persona të tjerë. Hetuesit e IPK-së do të hetojnë edhe lidhur me rrethanat e arratisjes nga stacioni policor i të dyshuarit të ndaluar nga policia.
IPK në koordinim të plotë me Prokurorinë do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast përderisa nga informacionet nga QKUK mësohet se i lënduari me armë të zjarrit është jashtë rrezikut për jetë.
